tazabzub

ho to saktā hai kisī dev ke jaise maiñ bhī

le uḌuuñ tujh ko kahīñ duur kī duniyāoñ meñ

dil kī dīvāroñ meñ lau terī muqayyad kar ke

tishna āshāoñ ke qile ko munavvar kar luuñ

ḳhvāb-e-derīna kī ta.abīr banā kar tujh ko

apnī āñkhoñ ke kivāḌoñ meñ muqaffal kar luuñ

saarī duniyā kī nigāhoñ se chhupā kar tujh ko

le uḌuuñ reñgte bal khāte hue rastoñ par

jo pahāḌoñ ke badan kaaT ke uupar kī taraf

sabz kaa.ī se aTe mahloñ pe jā rukte haiñ

ḳhud-ġharaz ho ke tujhe qaid meñ rakkhūñ aise

zī-nafas koī na ho chār-chfere tere

apnī tanhā.ī kī vahshat ko miTāne ke liye

DhūñD paa.e na kisī ko tū sivā.e mere

sirf ik maiñ huuñ aur ik tū ho rifāqat ke liye

mā-sivā mere na ho koī mohabbat ke liye

lekin ai phūl-sifat dekh ke sūrat terī

sochtā huuñ ki agar bāġh-e-jahāñ se tujh ko

toḌ bhī lūñgā to tū kaise jiyegī āḳhir

rañg-hā-rañg mahakte hue phūloñ se pare

duur uftāda pur-asrār ḳharābe meñ qayām

dard ke phailte saa.e meñ kahāñ mumkin hai

tujh tar-o-tāza kā ḳhush rahnā chaTaknā khilnā

merī vīrān-sarā.e meñ kahāñ mumkin hai

ho to sakta hai kisi dew ke jaise main bhi

le uDun tujh ko kahin dur ki duniyaon mein

dil ki diwaron mein lau teri muqayyad kar ke

tishna aashaon ke qile ko munawwar kar lun

KHwab-e-derina ki tabir bana kar tujh ko

apni aankhon ke kiwaDon mein muqaffal kar lun

sari duniya ki nigahon se chhupa kar tujh ko

le uDun rengte bal khate hue raston par

jo pahaDon ke badan kaT ke upar ki taraf

sabz kai se aTe mahlon pe ja rukte hain

KHud-gharaz ho ke tujhe qaid mein rakkhun aise

zi-nafas koi na ho chaar-chfere tere

apni tanhai ki wahshat ko miTane ke liye

DhunD pae na kisi ko tu siwae mere

sirf ek main hun aur ek tu ho rifaqat ke liye

ma-siwa mere na ho koi mohabbat ke liye

lekin ai phul-sifat dekh ke surat teri

sochta hun ki agar bagh-e-jahan se tujh ko

toD bhi lunga to tu kaise jiyegi aaKHir

rang-ha-rang mahakte hue phulon se pare

dur uftada pur-asrar KHarabe mein qayam

dard ke phailte sae mein kahan mumkin hai

tujh tar-o-taza ka KHush rahna chaTakna khilna

meri viran-sarae mein kahan mumkin hai