tere baad

koī muḳhlis mujhe tujh sā na milā tere baad

yaad aatī hai bahut terī vafā tere baad

ham haiñ jiine se ajal ham se ḳhafā tere baad

ham se dil dil se hai ārām judā tere baad

koī jāma.a na rahā muntashir aate haiñ nazar

ilm-o-fan dānish-o-dīñ sidq-o-safā tere baad

daulat-e-faqr amīroñ meñ nahīñ miltī ab

phirte haiñ jhāñkte dar-dar fuqarā tere baad

be-sabab tujh se vafādār ne muñh moḌ liyā

muñh dikhāte nahīñ ab ahl-e-vafā tere baad

bahs rahtī thī ki hai kaun vafā kā pāband

haif ye uqda-e-sar-basta khulā tere baad

had ko pahuñchī thī mohabbat mirī tere aage

ho ga.ī had se ye kam-baḳht sivā tere ba.ad

ganj-e-ummīd-o-tarab chhīn ke rū-posh huī

sāmne aa.ī na phir mere qazā tere baad

dil ko bad-zan na kar ai hādim-e-lazzāt ke said

jān-e-shīrīñ kā nahīñ kuchh bhī mazā tere baad

ye ayaañ hai ki uThā dahr se tū par ye batā

ho gayā baiThe biThā.e mujhe kyā tere baad

mahsharistāñ tapish-e-shauq se thā jo siina

maqbara hasrat-o-armāñ kā banā tere baad

shauq thā hañsne hañsāne kā tire aage mujhe

bhā ga.ī rone rulāne kī adā tere baad

thā tirī zaat pe mauqūf mirā nāz-o-ġhurūr

ḳhāksāroñ meñ shumār ab hai mirā tere baad

merā har fe.al tire fe.al kā ā.īna banā

bhā gayā mujh ko har ik shaġhl terā tere baad

baḌh ga.ī yā to tirī raa.e kī mauzūniyyat

nuur yā merī basārat kā baḌhā tere baad

pahle marġhūb the dānish-var-o-chālāk as.hāb

bhole-bhāloñ pe lagī hone fidā tere baad

na rahā ġhalba-e-saudā-e-bayān-e-ġhālib

'dāġh' ne paa.ī dil-e-tafta meñ jā tere baad

dost rakhtī thī hamesha tire har dost ko maiñ

ho ga.e apne ahibbā se sivā tere baad

be-hayā.ī hai agar 'zāhidā' le sher kā naam

aah ai qadr-shanās-e-sho.arā tere ba.ad

koi muKHlis mujhe tujh sa na mila tere baad

yaad aati hai bahut teri wafa tere baad

hum hain jine se ajal hum se KHafa tere baad

hum se dil dil se hai aaram juda tere baad

koi jama na raha muntashir aate hain nazar

ilm-o-fan danish-o-din sidq-o-safa tere baad

daulat-e-faqr amiron mein nahin milti ab

phirte hain jhankte dar-dar fuqara tere baad

be-sabab tujh se wafadar ne munh moD liya

munh dikhate nahin ab ahl-e-wafa tere baad

bahs rahti thi ki hai kaun wafa ka paband

haif ye uqda-e-sar-basta khula tere baad

had ko pahunchi thi mohabbat meri tere aage

ho gai had se ye kam-baKHt siwa tere baad

ganj-e-ummid-o-tarab chhin ke ru-posh hui

samne aai na phir mere qaza tere baad

dil ko bad-zan na kar ai hadim-e-lazzat ke said

jaan-e-shirin ka nahin kuchh bhi maza tere baad

ye ayan hai ki uTha dahr se tu par ye bata

ho gaya baiThe biThae mujhe kya tere baad

mahsharistan tapish-e-shauq se tha jo sina

maqbara hasrat-o-arman ka bana tere baad

shauq tha hansne hansane ka tere aage mujhe

bha gai rone rulane ki ada tere baad

tha teri zat pe mauquf mera naz-o-ghurur

KHaksaron mein shumar ab hai mera tere baad

mera har feal tere feal ka aaina bana

bha gaya mujh ko har ek shaghl tera tere baad

baDh gai ya to teri rae ki mauzuniyyat

nur ya meri basarat ka baDha tere baad

pahle marghub the danish-war-o-chaalak ashab

bhole-bhaalon pe lagi hone fida tere baad

na raha ghalba-e-sauda-e-bayan-e-ghaalib

'dagh' ne pai dil-e-tafta mein ja tere baad

dost rakhti thi hamesha tere har dost ko main

ho gae apne ahibba se siwa tere baad

be-hayai hai agar 'zahida' le sher ka nam

aah ai qadr-shanas-e-shoara tere baad