teri aamad mein taKHir kaise hui

terī aamad meñ tāḳhīr kaise huī

zindagī maut ke darmiyāñ ek lamhe ke pur-haul raste pe tū ne

hameñ muntazir kaise rakhā

tujhe kis ne rokā batā

terī aamad meñ tāḳhīr kaise huī

rāstoñ par havāoñ meñ ḳhvāhish kī ḳhushbū

tire lams kī chāhatoñ meñ bhaTaktī rahī

aur majbūr jismoñ meñ phailī baġhāvat kī bū

tere āzād hāthoñ kī hasrat meñ andhī fasīloñ se laḌtī rahī

tere sāñsoñ kī dastak

siyah-baḳht galiyoñ meñ sūraj ke rūdan sunātī rahī

tere qadmoñ kī aahaT

javāñ-sāl sīnoñ ke andar dhaḌaktī rahī

kis ne rokā tujhe

bol tū ne hameñ muntazir kaise rakkhā

batā terī aamad meñ tāḳhīr kaise huī

būḌhī maa.eñ duāoñ kī shaffāf chādar tire vāste

apnī sāñsoñ se din-rāt buntī rahīñ

laḌkiyāñ aur laḌke

chaurāhoñ dorāhoñ pe apne lahū se tirā naam likhte rahe

zard bachche hathelī pe ujlī umīdoñ ke phūloñ ko le kar

tirī raah takte rahe

kis ne rokā tujhe

bol tū ne hameñ muntazir kaise rakkhā

batā terī aamad meñ tāḳhīr kaise huī

sard āñkhoñ ke gadle ufuq par

tire aks ke chāñd kī raakh uḌtī hai

andhī fasīloñ ke nīche humakte hue ḳhuun ke jalte bujhte hue

jugnuoñ kā dhuāñ hai

javāñ-sāl sapnoñ kī qabroñ meñ kaalī havā sarsarātī hai

aur terī aamad kī ḳhvāhish meñ jiite hue log

jismoñ pe khiñchte hue saḳht saffāk lamhoñ meñ mahsūr

ḳhvāboñ kī dahlīz par mar chuke haiñ

thakī haarī ābādiyāñ ḳhāmushī kā kafan oḌh kar

maut meñ so rahī haiñ

chaurāhoñ dorāhoñ pe likkhā huā naam koī nahīñ jo paḌegā

koī nahīñ jo añdherī fasīloñ se aa kar laḌegā

teri aamad mein taKHir kaise hui

zindagi maut ke darmiyan ek lamhe ke pur-haul raste pe tu ne

hamein muntazir kaise rakha

tujhe kis ne roka bata

teri aamad mein taKHir kaise hui

raston par hawaon mein KHwahish ki KHushbu

tere lams ki chahaton mein bhaTakti rahi

aur majbur jismon mein phaili baghawat ki bu

tere aazad hathon ki hasrat mein andhi fasilon se laDti rahi

tere sanson ki dastak

siyah-baKHt galiyon mein suraj ke rudan sunati rahi

tere qadmon ki aahaT

jawan-sal sinon ke andar dhaDakti rahi

kis ne roka tujhe

bol tu ne hamein muntazir kaise rakkha

bata teri aamad mein taKHir kaise hui

buDhi maen duaon ki shaffaf chadar tere waste

apni sanson se din-raat bunti rahin

laDkiyan aur laDke

chaurahon dorahon pe apne lahu se tera nam likhte rahe

zard bachche hatheli pe ujli umidon ke phulon ko le kar

teri rah takte rahe

kis ne roka tujhe

bol tu ne hamein muntazir kaise rakkha

bata teri aamad mein taKHir kaise hui

sard aankhon ke gadle ufuq par

tere aks ke chand ki rakh uDti hai

andhi fasilon ke niche humakte hue KHun ke jalte bujhte hue

jugnuon ka dhuan hai

jawan-sal sapnon ki qabron mein kali hawa sarsaraati hai

aur teri aamad ki KHwahish mein jite hue log

jismon pe khinchte hue saKHt saffak lamhon mein mahsur

KHwabon ki dahliz par mar chuke hain

thaki haari aabaadiyan KHamushi ka kafan oDh kar

maut mein so rahi hain

chaurahon dorahon pe likkha hua nam koi nahin jo paDega

koi nahin jo andheri fasilon se aa kar laDega