تیری آمد میں تاخیر کیسے ہوئی

تیری آمد میں تاخیر کیسے ہوئی

زندگی موت کے درمیاں ایک لمحے کے پر ہول رستے پہ تو نے

ہمیں منتظر کیسے رکھا

تجھے کس نے روکا بتا

تیری آمد میں تاخیر کیسے ہوئی

راستوں پر ہواؤں میں خواہش کی خوشبو

ترے لمس کی چاہتوں میں بھٹکتی رہی

اور مجبور جسموں میں پھیلی بغاوت کی بو

تیرے آزاد ہاتھوں کی حسرت میں اندھی فصیلوں سے لڑتی رہی

تیرے سانسوں کی دستک

سیہ بخت گلیوں میں سورج کے رودن سناتی رہی

تیرے قدموں کی آہٹ

جواں سال سینوں کے اندر دھڑکتی رہی

کس نے روکا تجھے

بول تو نے ہمیں منتظر کیسے رکھا

بتا تیری آمد میں تاخیر کیسے ہوئی

بوڑھی مائیں دعاؤں کی شفاف چادر ترے واسطے

اپنی سانسوں سے دن رات بنتی رہیں

لڑکیاں اور لڑکے

چوراہوں دوراہوں پہ اپنے لہو سے ترا نام لکھتے رہے

زرد بچے ہتھیلی پہ اجلی امیدوں کے پھولوں کو لے کر

تری راہ تکتے رہے

کس نے روکا تجھے

بول تو نے ہمیں منتظر کیسے رکھا

بتا تیری آمد میں تاخیر کیسے ہوئی

سرد آنکھوں کے گدلے افق پر

ترے عکس کے چاند کی راکھ اڑتی ہے

اندھی فصیلوں کے نیچے ہمکتے ہوئے خون کے جلتے بجھتے ہوئے

جگنوؤں کا دھواں ہے

جواں سال سپنوں کی قبروں میں کالی ہوا سرسراتی ہے

اور تیری آمد کی خواہش میں جیتے ہوئے لوگ

جسموں پہ کھنچتے ہوئے سخت سفاک لمحوں میں محصور

خوابوں کی دہلیز پر مر چکے ہیں

تھکی ہاری آبادیاں خامشی کا کفن اوڑھ کر

موت میں سو رہی ہیں

چوراہوں دوراہوں پہ لکھا ہوا نام کوئی نہیں جو پڑے گا

کوئی نہیں جو اندھیری فصیلوں سے آ کر لڑے گا