teri aarzu

yuuñ basī rahtī hai mere dil meñ terī aarzū

jis tarah mai meñ nasha hai aur hai phūloñ meñ bū

jis tarah hai sabza-e-begāna meñ josh-e-numū

jis tarah mastī fazāoñ meñ nihāñ hai chār-sū

is tarah rahtī hai mere dil meñ terī aarzū

jis tarah barbat meñ naġhma jis tarah ātish meñ nuur

jis tarah qaus-o-quzah meñ rang baada meñ surūr

jis tarah tālib kī āñkhoñ meñ mohabbat kā zuhūr

is tarah rahtī hai mere meñ terī aarzū

jis tarah paanī meñ ThanDak jis tarah gul meñ sharāb

jis tarah ḳhanjar meñ jauhar jis tarah motī meñ aab

jis tarah arz-o-samā meñ fitrat-e-husn-o-shabāb

is tarah rahtī hai mere dil meñ terī aarzū

jis tarah kaif-e-mohabbat meñ bahār-e-zindagī

jis tarah doshīza-e-fitrat ke aariz par hañsī

jis tarah shor-e-ġham-e-dil meñ tilism-e-ḳhāmushī

is tarah rahtī hai mere dil meñ terī aarzū

yun basi rahti hai mere dil mein teri aarzu

jis tarah mai mein nasha hai aur hai phulon mein bu

jis tarah hai sabza-e-begana mein josh-e-numu

jis tarah masti fazaon mein nihan hai chaar-su

is tarah rahti hai mere dil mein teri aarzu

jis tarah barbat mein naghma jis tarah aatish mein nur

jis tarah qaus-o-quzah mein rang baada mein surur

jis tarah talib ki aankhon mein mohabbat ka zuhur

is tarah rahti hai mere mein teri aarzu

jis tarah pani mein ThanDak jis tarah gul mein sharab

jis tarah KHanjar mein jauhar jis tarah moti mein aab

jis tarah arz-o-sama mein fitrat-e-husn-o-shabab

is tarah rahti hai mere dil mein teri aarzu

jis tarah kaif-e-mohabbat mein bahaar-e-zindagi

jis tarah doshiza-e-fitrat ke aariz par hansi

jis tarah shor-e-gham-e-dil mein tilism-e-KHamushi

is tarah rahti hai mere dil mein teri aarzu