تیری آرزو

یوں بسی رہتی ہے میرے دل میں تیری آرزو

جس طرح مے میں نشہ ہے اور ہے پھولوں میں بو

جس طرح ہے سبزۂ بیگانہ میں جوش نمو

جس طرح مستی فضاؤں میں نہاں ہے چار سو

اس طرح رہتی ہے میرے دل میں تیری آرزو

جس طرح بربط میں نغمہ جس طرح آتش میں نور

جس طرح قوس و قزح میں رنگ بادہ میں سرور

جس طرح طالب کی آنکھوں میں محبت کا ظہور

اس طرح رہتی ہے میرے میں تیری آرزو

جس طرح پانی میں ٹھنڈک جس طرح گل میں شراب

جس طرح خنجر میں جوہر جس طرح موتی میں آب

جس طرح ارض و سما میں فطرت حسن و شباب

اس طرح رہتی ہے میرے دل میں تیری آرزو

جس طرح کیف محبت میں بہار زندگی

جس طرح دوشیزۂ فطرت کے عارض پر ہنسی

جس طرح شور غم دل میں طلسم خامشی

اس طرح رہتی ہے میرے دل میں تیری آرزو