tesha-ba-dast

kab se in pahāḌoñ ke siine chiir chiir kar

in kī rageñ khoj khoj kar

la.al-o-javāhar nikāl rahā huuñ

Dheroñ ke Dher lagā rahā huuñ

ba-zāhir bahut ḳhush huuñ

ki la.al-o-javāhar ke ye ambār maiñ ne lagā.e haiñ

ba-bātin albatta udaas huuñ

ki vo la.al jis kī mujhe talāsh hai

hanūz merī dastaras se pare hai

dar-asl vo pahāḌ abhī tak

merī aañkh se ojhal hai

jis meñ vo rag hai

jis rag meñ is la.al ke

hone kī ummīd hai

kab se in pahaDon ke sine chir chir kar

in ki ragen khoj khoj kar

lal-o-jawahar nikal raha hun

Dheron ke Dher laga raha hun

ba-zahir bahut KHush hun

ki lal-o-jawahar ke ye ambar main ne lagae hain

ba-baatin albatta udas hun

ki wo lal jis ki mujhe talash hai

hanuz meri dastaras se pare hai

dar-asl wo pahaD abhi tak

meri aankh se ojhal hai

jis mein wo rag hai

jis rag mein is lal ke

hone ki ummid hai