thake-mande parinde

parinde uḌ rahe haiñ duur ufuq

bojhal fazāoñ meñ

thake-māñde paroñ meñ

āgahī kī shorisheñ le kar

panāheñ DhūñDte haiñ

qurmuzī kirnoñ ke dāman meñ

koī jā-e-panāh ho

kunj ho

kaliyoñ kā āñgan ho

koī sahrā ho naḳhlistān ho

be-āb dariyā ho

thake-māñde parinde uḌ rahe haiñ

shaam sar par hai

faqat ik raat kā Thahrāv

ik ehsās kī vaadī

mirī qismat meñ likh de

ai mire parvardigār ab to

parinde thak chuke haiñ

bojh laade zindagī bhar kā

koī taarā kahīñ chamke

kahīñ aañsū koī Dhalke

ki manzil kā nishāñ ubhre

thake-māñde parinde uḌ rahe haiñ duur vaadī meñ

isī ummīd par rokī nahīñ parvāz taa.ir ne

koī bhūlī huī manzil bhī apnī muntazir hogī

unhī anjān rastoñ meñ kahīñ vo rahguzar hogī

jahāñ lamhe ko do panchhī

sukūñ kā saañs le leñge

adam ke paar jaane se zarā pahle

zarā haule

koī dam bhar ko jī leñge

zarā sā muskurā.eñge

thake-māñde parinde uḌ rahe haiñ

niil vaadī meñ

yahīñ ik jhiil hai aur paas hī

bahtā hai jharnā bhī

yahīñ par ghaas hai shabnam se bojhal

motiyoñ jaisī

thake-māñde parinde ab zarā ārām chāhte haiñ

zarā dam bhar ko āñkheñ muuñd kar bisrām chāhte haiñ

parinde uD rahe hain dur ufuq

bojhal fazaon mein

thake-mande paron mein

aagahi ki shorishen le kar

panahen DhunDte hain

qurmuzi kirnon ke daman mein

koi ja-e-panah ho

kunj ho

kaliyon ka aangan ho

koi sahra ho naKHlistan ho

be-ab dariya ho

thake-mande parinde uD rahe hain

sham sar par hai

faqat ek raat ka Thahraw

ek ehsas ki wadi

meri qismat mein likh de

ai mere parwardigar ab to

parinde thak chuke hain

bojh lade zindagi bhar ka

koi tara kahin chamke

kahin aansu koi Dhalke

ki manzil ka nishan ubhre

thake-mande parinde uD rahe hain dur wadi mein

isi ummid par roki nahin parwaz tair ne

koi bhuli hui manzil bhi apni muntazir hogi

unhi anjaan raston mein kahin wo rahguzar hogi

jahan lamhe ko do panchhi

sukun ka sans le lenge

adam ke par jaane se zara pahle

zara haule

koi dam bhar ko ji lenge

zara sa muskuraenge

thake-mande parinde uD rahe hain

nil wadi mein

yahin ek jhil hai aur pas hi

bahta hai jharna bhi

yahin par ghas hai shabnam se bojhal

motiyon jaisi

thake-mande parinde ab zara aaram chahte hain

zara dam bhar ko aankhen mund kar bisram chahte hain