tiflan ki to kuchh taqsir na thi

ai dost purāne pahchāne

ham kitnī muddat ba.ad mile

aur kitnī sadiyoñ ba.ad milī

ye ek nigāh-e-mehr-o-saḳhā

jo apnī saḳhā se ḳhud pur-nam

baiTho to zarā

batlāo to kyā

ye sach hai mere ta.āqub meñ

phirtā hai hujūm-e-sañg-zanāñ?

kyā niil bahut haiñ chehre par?

kyā kāsa-e-sar hai ḳhuun se tar?

paivand-e-qabā dushnām bahut

paivast-e-jigar ilzām bahut

ye nazr-e-karam kyuuñ hai pur-nam?

jab nikle kū-e-malāmat meñ

ik ġhauġhā to ham ne bhī sunā

tiflāñ kī to kuchh taqsīr na thī

ham aap hī the yuuñ ḳhud-rafta

mad.hoshī ne mohlat hī na dī

ham muḌ ke nazāra kar lete

bachne kī to sūrat ḳhair na thī

darmāñ kā hī chāra kar lete

pal bhar bhī hamāre kār-e-junūñ

ġhaflat jo gavāra kar lete

ai dost purane pahchane

hum kitni muddat baad mile

aur kitni sadiyon baad mili

ye ek nigah-e-mehr-o-saKHa

jo apni saKHa se KHud pur-nam

baiTho to zara

batlao to kya

ye sach hai mere taaqub mein

phirta hai hujum-e-sang-zanan?

kya nil bahut hain chehre par?

kya kasa-e-sar hai KHun se tar?

paiwand-e-qaba dushnam bahut

paiwast-e-jigar ilzam bahut

ye nazr-e-karam kyun hai pur-nam?

jab nikle ku-e-malamat mein

ek ghaugha to hum ne bhi suna

tiflan ki to kuchh taqsir na thi

hum aap hi the yun KHud-rafta

madhoshi ne mohlat hi na di

hum muD ke nazara kar lete

bachne ki to surat KHair na thi

darman ka hi chaara kar lete

pal bhar bhi hamare kar-e-junun

ghaflat jo gawara kar lete