Tin ka Dibba

samundar ke bosoñ se haarī huī ret

ret par TūTī-phūTī purānī siyah rañg chīzoñ ke ambār meñ

ek pichkā huā Tiin kā zard Dibbā

syāhī ke barham samundar ne jis ko uchhālā

syāhī ke be-nām sāhil ne jis ko sambhālā

añdhere meñ bikhre hue murda lamhoñ ke ik Dher meñ

pā-shikasta sī ik sā.at-e-nīm-jāñ

kaale qarnoñ ke safar-e-musalsal kī ik dāstāñ

kaale qarnoñ kī vo dāstāñ

tīrgī kī chaTānoñ se Takrā.ī

Takrā ke raushan huī

ghup añdhere meñ ubhrīñ lakīreñ

lakīroñ se bantī ga.iiñ sūrateñ

peḌ bādal makāñ ek raushan nadī

aur raushan nadī ke kināre chamaktī huī ghaas par

dūdhiyā uun kī dhajjiyāñ

raushnī kā ubhartā huā ik jahāñ

tīrgī ab kahāñ hai

taḌaptī huī ret par har taraf

shoḳh kirnoñ kā ek jaal sā tan gayā hai

chamaktā huā Tiin kā zard Dibbā

shuāoñ kā laavā ugalne lagā hai

ubalte hue raushnī ke samundar meñ Dhal kar

zamīñ se falak tak uchhalne lagā hai

samundar ke boson se haari hui ret

ret par TuTi-phuTi purani siyah rang chizon ke ambar mein

ek pichka hua Tin ka zard Dibba

syahi ke barham samundar ne jis ko uchhaala

syahi ke be-nam sahil ne jis ko sambhaala

andhere mein bikhre hue murda lamhon ke ek Dher mein

pa-shikasta si ek saat-e-nim-jaan

kale qarnon ke safar-e-musalsal ki ek dastan

kale qarnon ki wo dastan

tirgi ki chaTanon se Takrai

Takra ke raushan hui

ghup andhere mein ubhrin lakiren

lakiron se banti gain suraten

peD baadal makan ek raushan nadi

aur raushan nadi ke kinare chamakti hui ghas par

dudhiya un ki dhajjiyan

raushni ka ubharta hua ek jahan

tirgi ab kahan hai

taDapti hui ret par har taraf

shoKH kirnon ka ek jal sa tan gaya hai

chamakta hua Tin ka zard Dibba

shuaon ka lawa ugalne laga hai

ubalte hue raushni ke samundar mein Dhal kar

zamin se falak tak uchhalne laga hai