Tipu

uThā vo ḳhāk-e-srinigāpatam se mard-e-jarī

bidesiyoñ kī hukūmat thī larza-bar-andām

vo avvalīn mujāhid ki jis ne farmāyā

rahegā hind na hargiz firañgiyoñ kā ġhulām

paḌhā.ī ahl-e-vatan ko namāz-e-āzādī

sikhā.e jis ne hameñ us ke sab sujūd-o-qayām

banā.e tarz-navī jis ne kī thī mustahkam

badal ke rakh diyā jis ne qadāmatoñ kā nizām

falāh-e-qaum kā jis ne kiyā buland alam

rahī thī jis ko muqaddam hamesha ḳhair-e-anām

vo jāñ-farosh dulārā dakkan ke haidar kā

jo apnī zaat se ḳhud thā mujāhidoñ kā imaam

kahā ye jis ne ki ahl-e-vatan kā hai ye vatan

na ġhāsiboñ kā na aġhyār kā hai koī maqām

gavāh azmat-e-Tīpū hai rūd-e-kaveri

yahīñ huā thā nabard-āzmā vo ḳhush-farjām

shahīd kā use detī hai martaba tārīḳh

ba-kesh-e-sidq-o-safā hai yahī baḌā in.aam

azal se baat chalī aa.ī hai zamāne meñ

jo nek bande haiñ hotā hai un kā nek anjām

manār-e-masjid-e-jāme se de rahā huuñ sadā

dakan kī ḳhaak ke zarro tumheñ hazār salām

uTha wo KHak-e-srinigapatam se mard-e-jari

bidesiyon ki hukumat thi larza-bar-andam

wo awwalin mujahid ki jis ne farmaya

rahega hind na hargiz firangiyon ka ghulam

paDhai ahl-e-watan ko namaz-e-azadi

sikhae jis ne hamein us ke sab sujud-o-qayam

banae tarz-nawi jis ne ki thi mustahkam

badal ke rakh diya jis ne qadamaton ka nizam

falah-e-qaum ka jis ne kiya buland alam

rahi thi jis ko muqaddam hamesha KHair-e-anam

wo jaan-farosh dulara dakkan ke haidar ka

jo apni zat se KHud tha mujahidon ka imam

kaha ye jis ne ki ahl-e-watan ka hai ye watan

na ghasibon ka na aghyar ka hai koi maqam

gawah azmat-e-Tipu hai rud-e-kaweri

yahin hua tha nabard-azma wo KHush-farjam

shahid ka use deti hai martaba tariKH

ba-kesh-e-sidq-o-safa hai yahi baDa inam

azal se baat chali aai hai zamane mein

jo nek bande hain hota hai un ka nek anjam

manar-e-masjid-e-jame se de raha hun sada

dakan ki KHak ke zarro tumhein hazar salam