tijarat

is meñ kyā shak hai tijārat bādshāhī kaaj hai

ġhaur kar ke dekh lo tājir ke sar par taaj hai

hind kī tārīḳh paḌh kar hī sabaq hāsil karo

jo tijārat karne aa.e the ab un kā raaj hai

zinda rah saktā nahīñ hargiz tijārat ke baġhair

ham ne ye maanā ki europe markaz-e-afvāj hai

har dukān apnī jagah hai ek chhoTī saltanat

nafā kahte haiñ jise dar-asl us kā baaj hai

juz tijārat qaum kī mulkī siyāsat kuchh nahīñ

lutf-e-āzādī isī meñ hai yahī svārāj hai

zindagī kī rif.atoñ se hai tijārat hī murād

haañ yahī bām-e-taraqqī hai yahī me.arāj hai

mard-e-tājir ko ḳhudā kī zaat par hai e'timād

mard-e-chākar har ghaḌī aġhyār kā muhtāj hai

jab se ham ġhairoñ ke aage jhuk ga.e misl-e-kamāñ

tab se apnā dil sitam ke tiir kā āmāj hai

chal rahī haiñ zor se be-kāriyoñ kī āñdhiyāñ

naujavāñ kā gulsitān-e-zindagī tārāj hai

ye zarūrī kaam kal par Tālnā achchhā nahīñ

bil-yaqīñ ham ko tijārat kī zarūrat aaj hai

vaa.e hasrat kyoñ tumhārī aql par patthar paḌe

jis ko tum kankar samajhte ho vahī pukhrāj hai

phir ḳharīdo byaah kā sāmān pahle jaan lo

bas tijārat hī urūs-e-qaumiyat kā raaj hai

vo hamesha qadr karte haiñ savdeshī maal kī

qaum kā ehsās hai jin ko vatan kī laaj hai

ḳhuub motī rolte haiñ tājirān-e-bā-safā

'faiz' bāzār-e-tijārat qulzum-e-mavvāj hai

is mein kya shak hai tijarat baadshahi kaj hai

ghaur kar ke dekh lo tajir ke sar par taj hai

hind ki tariKH paDh kar hi sabaq hasil karo

jo tijarat karne aae the ab un ka raj hai

zinda rah sakta nahin hargiz tijarat ke baghair

hum ne ye mana ki europe markaz-e-afwaj hai

har dukan apni jagah hai ek chhoTi saltanat

nafa kahte hain jise dar-asl us ka baj hai

juz tijarat qaum ki mulki siyasat kuchh nahin

lutf-e-azadi isi mein hai yahi swaraj hai

zindagi ki rifaton se hai tijarat hi murad

han yahi baam-e-taraqqi hai yahi mearaj hai

mard-e-tajir ko KHuda ki zat par hai e'timad

mard-e-chaakar har ghaDi aghyar ka muhtaj hai

jab se hum ghairon ke aage jhuk gae misl-e-kaman

tab se apna dil sitam ke tir ka aamaj hai

chal rahi hain zor se be-kariyon ki aandhiyan

naujawan ka gulsitan-e-zindagi taraj hai

ye zaruri kaam kal par Talna achchha nahin

bil-yaqin hum ko tijarat ki zarurat aaj hai

wae hasrat kyon tumhaari aql par patthar paDe

jis ko tum kankar samajhte ho wahi pukhraj hai

phir KHarido byah ka saman pahle jaan lo

bas tijarat hi urus-e-qaumiyat ka raj hai

wo hamesha qadr karte hain sawdeshi mal ki

qaum ka ehsas hai jin ko watan ki laj hai

KHub moti rolte hain tajiran-e-ba-safa

'faiz' bazar-e-tijarat qulzum-e-mawwaj hai