tilism-e-KHayal

hasīn ḳhvāboñ kī aarzū thī

ki chāñd tāroñ kī anjuman meñ

bahār-e-rangīñ kī justujū meñ

fazā-e-dilkash kī ḳhāmushī meñ

charāġh-e-millat kī lau baḌhā.e

naqīb-e-sub.h-e-jamīl ban kar

mile the ham ahl-e-kārvāñ se

jo sū-e-manzil ravāñ-davāñ the

ajab irāde hazār va.ade

unhīñ irādoñ kī raushnī meñ

yaqīn-e-mohkam ke ban ke paikar

lahū ke dariyā se paar ho kar

masarratoñ kī barāt le kar

na.ī umangoñ ko saath le kar

ummīd-e-fardā se lau lagā.e

chale the laane nayā saverā

magar jo ḳhurshīd-e-sub.h niklā

tilism-e-ḳhvāb-o-ḳhayāl TuuTe

na chāñd tāroñ kī anjuman thī

na rang-o-nik.hat kī justujū thī

hasin KHwabon ki aarzu thi

ki chand taron ki anjuman mein

bahaar-e-rangin ki justuju mein

faza-e-dilkash ki KHamushi mein

charagh-e-millat ki lau baDhae

naqib-e-subh-e-jamil ban kar

mile the hum ahl-e-karwan se

jo su-e-manzil rawan-dawan the

ajab irade hazar wade

unhin iradon ki raushni mein

yaqin-e-mohkam ke ban ke paikar

lahu ke dariya se par ho kar

masarraton ki baraat le kar

nai umangon ko sath le kar

ummid-e-farda se lau lagae

chale the lane naya sawera

magar jo KHurshid-e-subh nikla

tilism-e-KHwab-o-KHayal TuTe

na chand taron ki anjuman thi

na rang-o-nikhat ki justuju thi