tilism-e-safar

ek dahshat-zada

niim tārīk jañgal meñ

aql-o-ḳhirad kī zarūrat nahīñ

shā.irī aur fiction kī

parchhā.iyoñ kā maiñ pīchhā karūñ

aur sapne bunūñ

aisī aadat nahīñ

niim tārīk jañgal ke

lambe safar pe jo nikle ho tum

to sun lo

niim tārīk jañgal meñ chāroñ taraf

abul-haul se vāsta bhī paḌegā tumhārā

ka.ī shakl meñ

varġhalā.engī tum ko chuḌeleñ

azdahoñ ke ilāqoñ se

guzroge tum

jism niilā bhī hogā tumhārā

magar aañkh kī putliyoñ meñ

zindagī kā saverā munavvar rahegā

ye alag baat tum

raqs-e-iblīs ke dā.ere meñ rahoge

niim tārīk jañgal ke

saare bhayānak darindoñ se tanhā

nihatte laḌoge

tum na hargiz Daroge

istifāda karoge mire tajraboñ se

to pāoge manzil

samundar kī maujeñ

ulajhtī haiñ barsoñ bhañvar se

to paatī haiñ manzil

niim tārīk jañgal

raqs-e-iblīs

kaalī chuḌeleñ

ḳhauf-zā jis qadar ho

tilism-e-safar

us ko manzil kī me.arāj samjho

ek dahshat-zada

nim tarik jangal mein

aql-o-KHirad ki zarurat nahin

shairi aur fiction ki

parchhaiyon ka main pichha karun

aur sapne bunun

aisi aadat nahin

nim tarik jangal ke

lambe safar pe jo nikle ho tum

to sun lo

nim tarik jangal mein chaaron taraf

abul-haul se wasta bhi paDega tumhaara

kai shakl mein

warghalaengi tum ko chuDelen

azdahon ke ilaqon se

guzroge tum

jism nila bhi hoga tumhaara

magar aankh ki putliyon mein

zindagi ka sawera munawwar rahega

ye alag baat tum

raqs-e-iblis ke daere mein rahoge

nim tarik jangal ke

sare bhayanak darindon se tanha

nihatte laDoge

tum na hargiz Daroge

istifada karoge mere tajrabon se

to paoge manzil

samundar ki maujen

ulajhti hain barson bhanwar se

to pati hain manzil

nim tarik jangal

raqs-e-iblis

kali chuDelen

KHauf-za jis qadar ho

tilism-e-safar

us ko manzil ki mearaj samjho