tinka

ye chhoTī sī nadī to mahz

nadī kī halkī sī jhalak hai

nadī kā puurā paaT dekhnā ho

to mere dil meñ utar kar dekho

jahāñ se us ke sote phūTte haiñ

lekin mere dil se

ek nahīñ

ka.ī nadiyoñ ke sote phūTte haiñ

kabhī kabhī ye sote ḳhushk bhī ho jaate haiñ

aur dil meñ dhuul sī uḌne lagtī hai

dil ek ret ke Tiile kī tarah dikhā.ī dene lagtā hai

lekin ye ret to bas is kī uuprī satah hai

is kī retīlī satah ke nīche

ek dariyā hai

jo aam taur par to ḳhāmosh rahtā hai

lekin kabhī kabhī

tarañg meñ aa jaa.e

to gaane bhī lagtā hai

kabhī kabhī us kā koī bol

be-qābū ho kar

ek naddī kā ta.assur detā hai

aur ek tinkā

der tak

us kī tarah par halkore letā rahtā hai

ye chhoTi si nadi to mahz

nadi ki halki si jhalak hai

nadi ka pura paT dekhna ho

to mere dil mein utar kar dekho

jahan se us ke sote phuTte hain

lekin mere dil se

ek nahin

kai nadiyon ke sote phuTte hain

kabhi kabhi ye sote KHushk bhi ho jate hain

aur dil mein dhul si uDne lagti hai

dil ek ret ke Tile ki tarah dikhai dene lagta hai

lekin ye ret to bas is ki upri satah hai

is ki retili satah ke niche

ek dariya hai

jo aam taur par to KHamosh rahta hai

lekin kabhi kabhi

tarang mein aa jae

to gane bhi lagta hai

kabhi kabhi us ka koi bol

be-qabu ho kar

ek naddi ka tassur deta hai

aur ek tinka

der tak

us ki tarah par halkore leta rahta hai