teri duniya ke naqshe mein

tirī duniyā meñ jañgal haiñ

hare bāġhāt haiñ

aur duur tak phaile bayābāñ haiñ

kahīñ par bastiyāñ haiñ

raushnī ke mantaqe haiñ

pahāḌoñ par utarte bādaloñ meñ

raqs kartā hai samundar chār-sū

isī amboh kā hissa nahīñ huuñ maiñ

kahāñ huuñ maiñ

maiñ tere lams se ik aag ban kar phailnā

tasḳhīr kī sūrat bipharnā chāhtā thā

aur itrā huuñ

kisī be-mehr sannāTe ke maidāñ meñ

hazīmat kī dahaktī ret par

bikhrā paḌā huuñ shaam kī sūrat

maiñ jiinā chāhtā thā terī duniyā meñ

tire hoñToñ pe khilte naam kī sūrat

kahīñ dushnām kī sūrat

kahīñ ārām kī sūrat

maiñ aañsū thā

tire chehre pe aa kar phuul dhartā thā

tire dukh par

girā kartā thā qadmoñ meñ

ai chashm-e-tar kahāñ huuñ maiñ

añdhere se bharī āñkhoñ meñ

chaltī hai havā har-sū

aur uḌte jā rahe haiñ rāste us meñ

zamānoñ ke kināroñ se

abad ke sard ḳhānoñ tak

havā chaltī hai har-sū

aur us kī ham-rahī meñ

do-qadam chaltā nahīñ huuñ maiñ

hujūm-e-roz-o-shab meñ

kis jagah sahmā huā huuñ maiñ

kahāñ huuñ maiñ

tirī duniyā ke naqshe meñ

kahāñ huuñ maiñ

teri duniya mein jangal hain

hare baghat hain

aur dur tak phaile bayaban hain

kahin par bastiyan hain

raushni ke mantaqe hain

pahaDon par utarte baadalon mein

raqs karta hai samundar chaar-su

isi amboh ka hissa nahin hun main

kahan hun main

main tere lams se ek aag ban kar phailna

tasKHir ki surat bipharna chahta tha

aur itra hun

kisi be-mehr sannaTe ke maidan mein

hazimat ki dahakti ret par

bikhra paDa hun sham ki surat

main jina chahta tha teri duniya mein

tere honTon pe khilte nam ki surat

kahin dushnam ki surat

kahin aaram ki surat

main aansu tha

tere chehre pe aa kar phul dharta tha

tere dukh par

gira karta tha qadmon mein

ai chashm-e-tar kahan hun main

andhere se bhari aankhon mein

chalti hai hawa har-su

aur uDte ja rahe hain raste us mein

zamanon ke kinaron se

abad ke sard KHanon tak

hawa chalti hai har-su

aur us ki ham-rahi mein

do-qadam chalta nahin hun main

hujum-e-roz-o-shab mein

kis jagah sahma hua hun main

kahan hun main

teri duniya ke naqshe mein

kahan hun main