teri hansi

falak kā ek taqāzā thā ibn-e-ādam se

sulag sulag ke rahe aur palak jhapak na sake

taras rahā ho fazā kā muhīb sannāTā

siDaul paañv kī paa.el magar chhanak na sake

kalī ke izn-e-tabassum ke saath shart ye hai

ki der tak kisī āġhosh meñ mahak na sake

maiñ sochtā huuñ ki ye terī be-hijāb hañsī!

mizāj-e-zīst se is darja muḳhtalif kyuuñ hai

ye ek sham.a jise sub.h kā yaqīn nahīñ

jigar ke zaḳhm-e-farozāñ se munharif kyuuñ hai

bharā huā hai nigāhoñ meñ zindagī ke dhuāñ

bas ek sho.ala-e-shab-tāb meñ sharar kyuuñ hai

mire vajūd meñ jis se ka.ī ḳharāsheñ haiñ

vo ik shikan tire māthe pe muḳhtasar kyuuñ hai

jamī huī hai sitāroñ pe āñsuoñ kī namī

tire charāġh kī lau itnī tez-tar kyuuñ hai

na.e shivāle meñ jā kar kisī ke teshe ne

bahut se but to girā.e bahut se but na gire

bas ek ḳhanda-e-be-bāk hī se kyā hogā

lahū kī zahmat-e-iqdām bhī zarūrī hai

zarā sī jur.at-e-idrāk hī se kyā hogā

gurez o raj.at o taḳhrīb hī sahī lekin

koī taḌap, koī hasrat, koī murād to hai

tirī hañsī se to merī shikast hai behtar

mirī shikast meñ thoḌā sā e'timād to hai

falak ka ek taqaza tha ibn-e-adam se

sulag sulag ke rahe aur palak jhapak na sake

taras raha ho faza ka muhib sannaTa

siDaul panw ki pael magar chhanak na sake

kali ke izn-e-tabassum ke sath shart ye hai

ki der tak kisi aaghosh mein mahak na sake

main sochta hun ki ye teri be-hijab hansi!

mizaj-e-zist se is darja muKHtalif kyun hai

ye ek shama jise subh ka yaqin nahin

jigar ke zaKHm-e-farozan se munharif kyun hai

bhara hua hai nigahon mein zindagi ke dhuan

bas ek shoala-e-shab-tab mein sharar kyun hai

mere wajud mein jis se kai KHarashen hain

wo ek shikan tere mathe pe muKHtasar kyun hai

jami hui hai sitaron pe aansuon ki nami

tere charagh ki lau itni tez-tar kyun hai

nae shiwale mein ja kar kisi ke teshe ne

bahut se but to girae bahut se but na gire

bas ek KHanda-e-be-bak hi se kya hoga

lahu ki zahmat-e-iqdam bhi zaruri hai

zara si jurat-e-idrak hi se kya hoga

gurez o rajat o taKHrib hi sahi lekin

koi taDap, koi hasrat, koi murad to hai

teri hansi se to meri shikast hai behtar

meri shikast mein thoDa sa e'timad to hai