tishnagi

ye chhalaktā huā jaam

maiñ ise pī na sakūñgā saaqī

āzmā.ī huī shai

zā.iqa talḳh

asar phīkā hai

chand lamhoñ kā surūr

jaise ik māh-jabīñ doshīza

muskurātī huī tezī se guzar jaatī hai

chand lamhoñ kā surūr

tishnagī sāġhar mai se bhī kahīñ jaatī hai

toḌ de jām-o-subū

tishnagī naam hai jiine kā

mujhe jiine de

tishnagī roz-e-azal se hai rafīq-e-dil-o-jāñ

tishnagī vaj.h-e-talab

zauq-e-talab husn-e-talab

tishnagī par hai zamāne kā madār

rāteñ jo āñkhoñ hī āñkhoñ meñ basar hotī haiñ

rāteñ jo pichhle pahar ashkoñ se muñh dhotī haiñ

sub.h hotī hai to pī jaatā hai sūraj un ko

raat Dhal jaatī hai shabnam ke hasīñ qatroñ meñ

sub.h-dam phūloñ ke lākhoñ sāġhar

muntazir hote haiñ sūraj ke liye

ye subūhī

ki jise pī ke damak uThtā hai

rū-e-ḳhurshīd-e-jahāñ-tāb

shuā.eñ jis kī

nāgineñ ban ke har ik buuñd ko pī jaatī haiñ

buuñd aañsū kī ho

yā shabnam kī

kurra-e-arz pe baaqī nahīñ rahne paatī

ḳhushk ho jaate haiñ sab

gul-e-tar

dīda-e-tar

koī ḳhurshīd kī saffāk tapish pī jaa.e

raat ke chāñd kā aalam dekho

chāñd ik ghūñT meñ pī jaatā hai sūraj kī tapish

shabnam-o-ashk duā karte haiñ

ki zamāne meñ sahar ho na kabhī

aur ye silsila-e-tishna-labī

ai ḳhudā dahr meñ jaarī hai na jaane kab se

kaise mānūñ

lab-e-lālīñ ke hazāroñ bose

ruuh kī pyaas bujhā sakte haiñ

ishq sairāb nahīñ ho saktā

ye chhalaktā huā jaam

maiñ ise pī na sakūñgā saaqī

ye chhalakta hua jam

main ise pi na sakunga saqi

aazmai hui shai

zaiqa talKH

asar phika hai

chand lamhon ka surur

jaise ek mah-jabin doshiza

muskuraati hui tezi se guzar jati hai

chand lamhon ka surur

tishnagi saghar mai se bhi kahin jati hai

toD de jam-o-subu

tishnagi nam hai jine ka

mujhe jine de

tishnagi roz-e-azal se hai rafiq-e-dil-o-jaan

tishnagi wajh-e-talab

zauq-e-talab husn-e-talab

tishnagi par hai zamane ka madar

raaten jo aankhon hi aankhon mein basar hoti hain

raaten jo pichhle pahar ashkon se munh dhoti hain

subh hoti hai to pi jata hai suraj un ko

raat Dhal jati hai shabnam ke hasin qatron mein

subh-dam phulon ke lakhon saghar

muntazir hote hain suraj ke liye

ye subuhi

ki jise pi ke damak uThta hai

ru-e-KHurshid-e-jahan-tab

shuaen jis ki

naginen ban ke har ek bund ko pi jati hain

bund aansu ki ho

ya shabnam ki

kurra-e-arz pe baqi nahin rahne pati

KHushk ho jate hain sab

gul-e-tar

dida-e-tar

koi KHurshid ki saffak tapish pi jae

raat ke chand ka aalam dekho

chand ek ghunT mein pi jata hai suraj ki tapish

shabnam-o-ashk dua karte hain

ki zamane mein sahar ho na kabhi

aur ye silsila-e-tishna-labi

ai KHuda dahr mein jari hai na jaane kab se

kaise manun

lab-e-lalin ke hazaron bose

ruh ki pyas bujha sakte hain

ishq sairab nahin ho sakta

ye chhalakta hua jam

main ise pi na sakunga saqi