to ye bhi hoga

ye saare rishte tamām chehre

jinheñ tum apnā samajh rahe ho ye sab tumheñ ajnabī lageñge

bulandiyoñ ke har ik safar par baḌī mohabbat

jatā.egā ye hujūm-e-yārāñ

sabhī ke lafzoñ meñ shahd hogā sabhī ke hāthoñ meñ phuul hoñge

magar diloñ meñ babūl hoñge

bulandiyoñ ke safar se lauTo to un ke chehroñ pe ġhaur karnā bujhe bujhe se tum un ke lahjoñ pe ġhaur karnā tamām chehre malūl hoñge

har ik suḳhan meñ chubhan milegī

har ik sadā meñ thakan milegī

har ik jabīñ par shikan milegī

rafāqatoñ ke badalte manzar tumheñ jo hairat-zada kareñ to ye ġhaur karnā

masāfatoñ ke baġhair āḳhir badan sabhī ke niDhāl kyoñ haiñ

baġhair ḳhatt-e-urūj khīñche

ayaañ ye ḳhatt-e-zavāl kyoñ haiñ

safar to tum ne kiye haiñ lekin musāfirat kī ye gard kaise tamām āñkhoñ meñ bhar ga.ī hai tamām chehroñ pe jam ga.ī hai

pas-e-rifāqat badalte rishtoñ kī ma.anaviyyat pe ġhaur karnā magar na hargiz udaas honā tum un se milte rahe ho jaise tum un se vaise hī milte rahnā hamesha un se vafā.eñ karnā aur un ke haq meñ duā.eñ karnā

ḳhudā unheñ bhī hidāyateñ de azal se ab tak yahī huā hai munāfiqoñ ne hamesha hoñToñ pe gul khilā.e hamesha hāthoñ meñ phuul rakkhe magar diloñ meñ babūl rakkhe

ye sare rishte tamam chehre

jinhen tum apna samajh rahe ho ye sab tumhein ajnabi lagenge

bulandiyon ke har ek safar par baDi mohabbat

jataega ye hujum-e-yaran

sabhi ke lafzon mein shahd hoga sabhi ke hathon mein phul honge

magar dilon mein babul honge

bulandiyon ke safar se lauTo to un ke chehron pe ghaur karna bujhe bujhe se tum un ke lahjon pe ghaur karna tamam chehre malul honge

har ek suKHan mein chubhan milegi

har ek sada mein thakan milegi

har ek jabin par shikan milegi

rafaqaton ke badalte manzar tumhein jo hairat-zada karen to ye ghaur karna

masafaton ke baghair aaKHir badan sabhi ke niDhaal kyon hain

baghair KHatt-e-uruj khinche

ayan ye KHatt-e-zawal kyon hain

safar to tum ne kiye hain lekin musafirat ki ye gard kaise tamam aankhon mein bhar gai hai tamam chehron pe jam gai hai

pas-e-rifaqat badalte rishton ki manawiyyat pe ghaur karna magar na hargiz udas hona tum un se milte rahe ho jaise tum un se waise hi milte rahna hamesha un se wafaen karna aur un ke haq mein duaen karna

KHuda unhen bhi hidayaten de azal se ab tak yahi hua hai munafiqon ne hamesha honTon pe gul khilae hamesha hathon mein phul rakkhe magar dilon mein babul rakkhe