mere ahd ke hasino

vo sitāre jin kī ḳhātir ka.ī be-qarār sadiyāñ

mirī tīra-baḳht duniyā meñ sitāra-vār jāgīñ

kabhī rif.atoñ pe lapkīñ kabhī vus.atoñ se uljhīñ

kabhī sogvār so.eñ kabhī naġhma-bār jāgīñ

vo buland-bām taare vo falak-maqām taare

vo nishān de ke apnā rahe be-nishāñ hamesha

vo hasīñ vo nūr-zāde vo ḳhalā ke shāhzāde

jo hamārī qismatoñ par rahe hukmarāñ hamesha

jinheñ muzmahil diloñ ne abadī panāh jaanā

thake-hāre qāfiloñ ne jinheñ ḳhizr-e-rāh jaanā

jinheñ kam-sinoñ ne chāhā ki lapak ke pyaar kar leñ

jinheñ mahvashoñ ne māñgā ki gale kā haar kar leñ

jinheñ āshiqoñ ne chāhā ki falak se toḌ laa.eñ

kisī raah meñ bichhā.eñ kisī sej par sajā.eñ

jinheñ but-garoñ ne chāhā ki sanam banā ke pūjeñ

ye jo duur ke hasīñ haiñ unheñ paas lā ke pūjeñ

jinheñ mutriboñ ne chāhā ki sadāoñ meñ piro leñ

jinheñ shā.iroñ ne chāhā ki ḳhayāl meñ samo leñ

ho hazār koshishoñ par bhī shumār meñ na aa.e

kabhī ḳhāk-e-be-bizā.at ke dayār meñ na aa.e

jo hamārī dastaras se rahe duur duur ab tak

hameñ dekhte rahe haiñ jo ba-sad ġhurūr ab tak

mire ahd ke hasīno vo nazar-navāz taare

mirā daur-e-ishq-parvar tumheñ nazr de rahā hai

vo junūñ jo āb-o-ātish ko asiir kar chukā thā

vo ḳhalā kī vus.atoñ se bhī ḳhirāj le rahā hai

mire saath rahne vaalo mire ba.ad aane vaalo

mere daur kā ye tohfa tumheñ sāzgār aa.e

kabhī tum ḳhalā se guzro kisī sīm-tan kī ḳhātir

kabhī tum ko dil meñ rakh kar koī gul-azār aa.e

wo sitare jin ki KHatir kai be-qarar sadiyan

meri tira-baKHt duniya mein sitara-war jagin

kabhi rifaton pe lapkin kabhi wusaton se uljhin

kabhi sogwar soen kabhi naghma-bar jagin

wo buland-baam tare wo falak-maqam tare

wo nishan de ke apna rahe be-nishan hamesha

wo hasin wo nur-zade wo KHala ke shahzade

jo hamari qismaton par rahe hukmaran hamesha

jinhen muzmahil dilon ne abadi panah jaana

thake-haare qafilon ne jinhen KHizr-e-rah jaana

jinhen kam-sinon ne chaha ki lapak ke pyar kar len

jinhen mahwashon ne manga ki gale ka haar kar len

jinhen aashiqon ne chaha ki falak se toD laen

kisi rah mein bichhaen kisi sej par sajaen

jinhen but-garon ne chaha ki sanam bana ke pujen

ye jo dur ke hasin hain unhen pas la ke pujen

jinhen mutribon ne chaha ki sadaon mein piro len

jinhen shairon ne chaha ki KHayal mein samo len

ho hazar koshishon par bhi shumar mein na aae

kabhi KHak-e-be-bizaat ke dayar mein na aae

jo hamari dastaras se rahe dur dur ab tak

hamein dekhte rahe hain jo ba-sad ghurur ab tak

mere ahd ke hasino wo nazar-nawaz tare

mera daur-e-ishq-parwar tumhein nazr de raha hai

wo junun jo aab-o-atish ko asir kar chuka tha

wo KHala ki wusaton se bhi KHiraj le raha hai

mere sath rahne walo mere baad aane walo

mere daur ka ye tohfa tumhein sazgar aae

kabhi tum KHala se guzro kisi sim-tan ki KHatir

kabhi tum ko dil mein rakh kar koi gul-azar aae