raqib se!

aa ki vābasta haiñ us husn kī yādeñ tujh se

jis ne is dil ko parī-ḳhāna banā rakkhā thā

jis kī ulfat meñ bhulā rakkhī thī duniyā ham ne

dahr ko dahr kā afsāna banā rakkhā thā

āshnā haiñ tire qadmoñ se vo rāheñ jin par

us kī mad.hosh javānī ne ināyat kī hai

kārvāñ guzre haiñ jin se usī rānā.ī ke

jis kī in āñkhoñ ne be-sūd ibādat kī hai

tujh se khelī haiñ vo mahbūb havā.eñ jin meñ

us ke malbūs kī afsurda mahak baaqī hai

tujh pe barsā hai usī baam se mahtāb kā nuur

jis meñ biitī huī rātoñ kī kasak baaqī hai

tū ne dekhī hai vo peshānī vo ruḳhsār vo hoñT

zindagī jin ke tasavvur meñ luTā dī ham ne

tujh pe uTThī haiñ vo khoī huī sāhir āñkheñ

tujh ko ma.alūm hai kyuuñ umr gañvā dī ham ne

ham pe mushtarka haiñ ehsān ġham-e-ulfat ke

itne ehsān ki ginvā.ūñ to ginvā na sakūñ

ham ne is ishq meñ kyā khoyā hai kyā sīkhā hai

juz tire aur ko samjhā.ūñ to samjhā na sakūñ

ājizī sīkhī ġharīboñ kī himāyat sīkhī

yās-o-hirmān ke dukh-dard ke ma.anī sīkhe

zer-dastoñ ke masā.ib ko samajhnā sīkhā

sard aahoñ ke ruḳh-e-zard ke ma.anī sīkhe

jab kahīñ baiTh ke rote haiñ vo bekas jin ke

ashk āñkhoñ meñ bilakte hue so jaate haiñ

nā-tavānoñ ke nivāloñ pe jhapaTte haiñ uqaab

baazū tole hue mañDlāte hue aate haiñ

jab kabhī biktā hai bāzār meñ mazdūr kā gosht

shāh-rāhoñ pe ġharīboñ kā lahū bahtā hai

aag sī siine meñ rah rah ke ubaltī hai na pūchh

apne dil par mujhe qaabū hī nahīñ rahtā hai

aa ki wabasta hain us husn ki yaaden tujh se

jis ne is dil ko pari-KHana bana rakkha tha

jis ki ulfat mein bhula rakkhi thi duniya hum ne

dahr ko dahr ka afsana bana rakkha tha

aashna hain tere qadmon se wo rahen jin par

us ki madhosh jawani ne inayat ki hai

karwan guzre hain jin se usi ranai ke

jis ki in aankhon ne be-sud ibaadat ki hai

tujh se kheli hain wo mahbub hawaen jin mein

us ke malbus ki afsurda mahak baqi hai

tujh pe barsa hai usi baam se mahtab ka nur

jis mein biti hui raaton ki kasak baqi hai

tu ne dekhi hai wo peshani wo ruKHsar wo honT

zindagi jin ke tasawwur mein luTa di hum ne

tujh pe uTThi hain wo khoi hui sahir aankhen

tujh ko malum hai kyun umr ganwa di hum ne

hum pe mushtarka hain ehsan gham-e-ulfat ke

itne ehsan ki ginwaun to ginwa na sakun

hum ne is ishq mein kya khoya hai kya sikha hai

juz tere aur ko samjhaun to samjha na sakun

aajizi sikhi gharibon ki himayat sikhi

yas-o-hirman ke dukh-dard ke mani sikhe

zer-daston ke masaib ko samajhna sikha

sard aahon ke ruKH-e-zard ke mani sikhe

jab kahin baiTh ke rote hain wo bekas jin ke

ashk aankhon mein bilakte hue so jate hain

na-tawanon ke niwalon pe jhapaTte hain uqab

bazu tole hue manDlate hue aate hain

jab kabhi bikta hai bazar mein mazdur ka gosht

shah-rahon pe gharibon ka lahu bahta hai

aag si sine mein rah rah ke ubalti hai na puchh

apne dil par mujhe qabu hi nahin rahta hai