tum nahin aae the jab

tum nahīñ aa.e the jab tab bhī to maujūd the tum

aañkh meñ nuur kī aur dil meñ lahū kī sūrat

dard kī lau kī tarah pyaar kī ḳhushbū kī tarah

bevafā vādoñ kī dildārī kā andāz liye

tum nahīñ aa.e the jab tab bhī to tum aa.e the

raat ke siine meñ mahtāb ke ḳhanjar kī tarah

sub.h ke haath meñ ḳhurshīd ke sāġhar kī tarah

shāḳh-e-ḳhūñ-rañg-e-tamannā meñ gul-e-tar kī tarah

tum nahīñ aaoge jab tab bhī to tum aaoge

yaad kī tarah dhaḌakte hue dil kī sūrat

ġham ke paimāna-e-sar-shār ko chhalkāte hue

barg-hā-e-lab-o-ruḳhsār ko mahkāte hue

dil ke bujhte hue añgāre ko dahkāte hue

zulf-dar-zulf bikhar jā.egā phir raat kā rañg

shab-e-tanhā.ī meñ bhī lutf-e-mulāqāt kā rañg

roz lā.egī sabā kū-e-sabāhat se payām

roz gā.egī sahar tahniyat-e-jashn-e-firāq

aao aane kī kareñ bāteñ ki tum aa.e ho

ab tum aa.e ho to maiñ kaun sī shai nazr karo

ki mire paas ba-juz mehr o vafā kuchh bhī nahīñ

ek ḳhūñ-gashta tamannā ke sivā kuchh bhī nahīñ

tum nahin aae the jab tab bhi to maujud the tum

aankh mein nur ki aur dil mein lahu ki surat

dard ki lau ki tarah pyar ki KHushbu ki tarah

bewafa wadon ki dildari ka andaz liye

tum nahin aae the jab tab bhi to tum aae the

raat ke sine mein mahtab ke KHanjar ki tarah

subh ke hath mein KHurshid ke saghar ki tarah

shaKH-e-KHun-rang-e-tamanna mein gul-e-tar ki tarah

tum nahin aaoge jab tab bhi to tum aaoge

yaad ki tarah dhaDakte hue dil ki surat

gham ke paimana-e-sar-shaar ko chhalkate hue

barg-ha-e-lab-o-ruKHsar ko mahkate hue

dil ke bujhte hue angare ko dahkate hue

zulf-dar-zulf bikhar jaega phir raat ka rang

shab-e-tanhai mein bhi lutf-e-mulaqat ka rang

roz laegi saba ku-e-sabahat se payam

roz gaegi sahar tahniyat-e-jashn-e-firaq

aao aane ki karen baaten ki tum aae ho

ab tum aae ho to main kaun si shai nazr karo

ki mere pas ba-juz mehr o wafa kuchh bhi nahin

ek KHun-gashta tamanna ke siwa kuchh bhi nahin