diwali

dīvālī

raghubir kī paak yaad kā unvāñ liye hue

zulmat ke ghar meñ jalva-e-tābāñ liye hue

tārīkiyoñ meñ nuur kā sāmāñ liye hue

aa.ī hai apne saath charāġhāñ liye hue

allāh-re ye taab ye tanvīr ye jamāl

ḳhurshīd kī nazar bhī hai jamnī yahāñ muhāl

taarī hai zāhidoñ pe bhī aalam surūr kā

ab kis liye ḳhayāl ho hūr-o-qusūr kā

aalam to dekhiye shab-e-yaldā pe nuur kā

julte haiñ ye charāġh ki jalva hai tuur kā

manzar bahisht kā hai ye shab hai shab-e-barāt

tanvīr-e-āftāb kā partav hai aaj raat

vo raam jo ki kāmil-e-sidq-o-safā rahā

vo raam jo ki sālik-e-rāh-e-huda rahā

vo raam jo ki ā.īna-e-haq-numā rahā

vo raam jo ki qāte-e-jaur-o-jafā rahā

ye raat yādgār hai us nek zaat kī

us paikar-e-ḳhulūs kī vaalā sifāt kī

chaudah baras ke ba.ad jo aayā vatan meñ raam

har lab thā vaqf-e-naġhma to har dil thā shād-kām

thī rashk-e-nūr sub.h-e-banaras avadh kī shaam

ahl-e-ayodhyā kī zabāñ par thā ye kalām

ham be-basoñ kā qāfila-sālār aa gayā

ban-bāsiyoñ kī fauj kā sardār aa gayā

diwali

raghubir ki pak yaad ka unwan liye hue

zulmat ke ghar mein jalwa-e-taban liye hue

tarikiyon mein nur ka saman liye hue

aai hai apne sath charaghan liye hue

allah-re ye tab ye tanwir ye jamal

KHurshid ki nazar bhi hai jamni yahan muhaal

tari hai zahidon pe bhi aalam surur ka

ab kis liye KHayal ho hur-o-qusur ka

aalam to dekhiye shab-e-yalda pe nur ka

julte hain ye charagh ki jalwa hai tur ka

manzar bahisht ka hai ye shab hai shab-e-baraat

tanwir-e-aftab ka partaw hai aaj raat

wo ram jo ki kaamil-e-sidq-o-safa raha

wo ram jo ki salik-e-rah-e-huda raha

wo ram jo ki aaina-e-haq-numa raha

wo ram jo ki qate-e-jaur-o-jafa raha

ye raat yaadgar hai us nek zat ki

us paikar-e-KHulus ki wala sifat ki

chaudah baras ke baad jo aaya watan mein ram

har lab tha waqf-e-naghma to har dil tha shad-kaam

thi rashk-e-nur subh-e-banaras awadh ki sham

ahl-e-ayodhya ki zaban par tha ye kalam

hum be-bason ka qafila-salar aa gaya

ban-basiyon ki fauj ka sardar aa gaya