main kyun bhul jaun

tirī chashm-e-mai guuñ kā labrez sāġhar

javānī tirī kaif-āvar javānī

gulistāñ dar āġhosh-e-husn-e-tabassum

vo tere lab-e-surḳh kī gul-fishānī

takallum ke andāz ḳhāmoshiyoñ meñ

zabān-e-nazar par hayā kī kahānī

tū hī mujh se kah de maiñ kyuuñ bhuul jā.ūñ

vo sāñsoñ kī tezī vo siine kī dhaḌkan

vo donoñ kā chhup-chhup ke aañsū bahānā

vo tajdīd-e-ulfat ke sau-sau bahāne

vo ik dūsre se yuuñ hī ruuTh jaanā

vo tark-e-mohabbat ke ilzām de kar

kisī kā kisī ko hañsī meñ rulānā

tū hī mujh se kah de maiñ kyuuñ bhuul jā.ūñ

vo pās-e-adab vo ḳhulūs-e-mohabbat

vafūr-e-tamannā meñ ḳhāmosh rahnā

vo nazzārgī meñ tahayyur kā aalam

ḳhud apnī nigāhoñ se ḳhāmosh rahnā

razā-jū-tabī.at vo ta.alīm-koshī

ġham-o-rañj meñ bhī vafā-kosh rahnā

tū hī mujh se kah de maiñ kyuuñ bhuul jā.ūñ

savāloñ kā tūmār mub.ham zabāñ meñ

magar rāz-e-dil kā na iz.hār karnā

nigāheñ milāne meñ to ik jhijhak sī

magar dil hī dil meñ mujhe pyaar karnā

vo arz-e-mohabbat pe ma.asūm va.ade

vo luknat zabāñ kī vo iqrār karnā

tū hī mujh se kah de maiñ kyuuñ bhuul jā.ūñ

tirī chashm-e-pur-nam vo mas.ūd saa.at

yaqīñ ban gayā jab gumān-e-mohabbat

mohabbat ke din aur vo furqat kī rāteñ

duā.eñ thiiñ jab tarjumān-e-mohabbat

vo ḳhat jin kā har lafz ik dāstāñ thā

vo jazbāt se pur-bayān-e-mohabbat

tū hī mujh se kah de maiñ kyuuñ bhuul jā.ūñ

vo chhiTkī huī chāñdnī kī bahāreñ

vo gul-posh rāteñ vo dilkash nazāre

manāzir simaTte hue aabjū meñ

falak par chamakte hue chāñd taare

vo thak kar kisī kā yuuñ hī baiTh jaanā

vo uThnā kisī kā kisī ke sahāre

tū hī mujh se kah de maiñ kyuuñ bhuul jā.ūñ

vo tūfān-e-jazbāt-o-zor-e-tamannā

vo josh-e-mohabbat vo pur-shauq bāteñ

vo ghaḌiyāñ vo ārām-o-rāhat kī ghaḌiyāñ

vo farhat ke din vo masarrat kī rāteñ

vo ghāteñ vo ghātoñ ke parde meñ va.ade

vo va.ade vo va.adoñ ke parde meñ ghāteñ

tū hī mujh se kah de maiñ kyuuñ bhuul jā.ūñ

ma.āl-e-masarrat vo majbūr aañsū

vo kaif-e-tarb kā ġham-anjām honā

pur-ilzām bāteñ vo sab kī zabāñ par

mohabbat ke qisse kā vo aam honā

vo bargashta-ḳhātir buzurgoñ kī bāteñ

vo ma.asūm rūhoñ kā badnām honā

tū hī mujh se kah de maiñ kyuuñ bhuul jā.ūñ

vo din tafraqa-ḳhez majbūriyoñ kā

fareb-e-muqaddar kī vo chīra-dastī

ḳhumār-e-mai aish aur nā-murādī

vo marg-e-tamannā vo anjām-e-mastī

rusūm-e-kuhan kī sitam-āfrīnī

zamāne kā jaur-e-qadāmat-parastī

tū hī mujh se kah de maiñ kyuuñ bhuul jā.ūñ

teri chashm-e-mai gun ka labrez saghar

jawani teri kaif-awar jawani

gulistan dar aaghosh-e-husn-e-tabassum

wo tere lab-e-surKH ki gul-fishani

takallum ke andaz KHamoshiyon mein

zaban-e-nazar par haya ki kahani

tu hi mujh se kah de main kyun bhul jaun

wo sanson ki tezi wo sine ki dhaDkan

wo donon ka chhup-chhup ke aansu bahana

wo tajdid-e-ulfat ke sau-sau bahane

wo ek dusre se yun hi ruTh jaana

wo tark-e-mohabbat ke ilzam de kar

kisi ka kisi ko hansi mein rulana

tu hi mujh se kah de main kyun bhul jaun

wo pas-e-adab wo KHulus-e-mohabbat

wafur-e-tamanna mein KHamosh rahna

wo nazzargi mein tahayyur ka aalam

KHud apni nigahon se KHamosh rahna

raza-ju-tabiat wo talim-koshi

gham-o-ranj mein bhi wafa-kosh rahna

tu hi mujh se kah de main kyun bhul jaun

sawalon ka tumar mubham zaban mein

magar raaz-e-dil ka na izhaar karna

nigahen milane mein to ek jhijhak si

magar dil hi dil mein mujhe pyar karna

wo arz-e-mohabbat pe masum wade

wo luknat zaban ki wo iqrar karna

tu hi mujh se kah de main kyun bhul jaun

teri chashm-e-pur-nam wo masud saat

yaqin ban gaya jab guman-e-mohabbat

mohabbat ke din aur wo furqat ki raaten

duaen thin jab tarjuman-e-mohabbat

wo KHat jin ka har lafz ek dastan tha

wo jazbaat se pur-bayan-e-mohabbat

tu hi mujh se kah de main kyun bhul jaun

wo chhiTki hui chandni ki bahaaren

wo gul-posh raaten wo dilkash nazare

manazir simaTte hue aabju mein

falak par chamakte hue chand tare

wo thak kar kisi ka yun hi baiTh jaana

wo uThna kisi ka kisi ke sahaare

tu hi mujh se kah de main kyun bhul jaun

wo tufan-e-jazbaat-o-zor-e-tamanna

wo josh-e-mohabbat wo pur-shauq baaten

wo ghaDiyan wo aaram-o-rahat ki ghaDiyan

wo farhat ke din wo masarrat ki raaten

wo ghaten wo ghaton ke parde mein wade

wo wade wo wadon ke parde mein ghaten

tu hi mujh se kah de main kyun bhul jaun

maal-e-masarrat wo majbur aansu

wo kaif-e-tarb ka gham-anjam hona

pur-ilzam baaten wo sab ki zaban par

mohabbat ke qisse ka wo aam hona

wo bargashta-KHatir buzurgon ki baaten

wo masum ruhon ka badnam hona

tu hi mujh se kah de main kyun bhul jaun

wo din tafraqa-KHez majburiyon ka

fareb-e-muqaddar ki wo chira-dasti

KHumar-e-mai aish aur na-muradi

wo marg-e-tamanna wo anjam-e-masti

rusum-e-kuhan ki sitam-afrini

zamane ka jaur-e-qadamat-parasti

tu hi mujh se kah de main kyun bhul jaun