punjab

zinda-dil punjab ke beTo tumheñ merā salām

tum parastār-e-gurū-nānak fidā-e-kirishn-o-rām

ye tumhārā des raaja drupd kā panchāl des

haañ vahī ranjīt-singh ke daur kā ḳhush-hāl des

nām-levā jin ke tum ho un kī sīrat be-misāl

un kī jur.at be-misāl un kī shujā.at be-misāl

is meñ sher-o-shā.erī hai is meñ raqs-o-rañg bhī

hiir vāris-shāh kī bhī hai rabāb-o-chañg bhī

vīr-singh aur amritā-pirītam yahāñ māhir yahāñ

'arsh' 'aḳhtar' 'josh' aur 'mahrūm' se shā.ir yahāñ

shīr-e-gul ke mū-qalam se ḳhāma-e-mānī ḳhajil

is kī tasvīroñ meñ hai betāb panjāban kā dil

lājpat-rā.e yahīñ jām-e-shahādat pī ga.e

jaane kitne qaum kī ḳhātir mare aur jī ga.e

sar-zamīn-e-hind kā ye bāzū-e-shamshīr-e-zan

jis ke mardān-e-jarī haiñ sho.ala-bār-o-saf-shikan

khetiyoñ meñ jis ke barakat jis ke khaliyānoñ meñ nuur

jis ke bāġhoñ meñ iram bas ke pahāḌoñ par hai tuur

jis ke mard-o-zan kā hissa-e-ḳhūb-rūī kā jalāl

jin ke chehroñ par chhiḌaktī hai tavānā.ī gulāl

bhākḌā-nañgal kī jis ne be-badal ta.amīr dī

apne farzandoñ ko jis ne ḳhūbī-e-tadbīr dī

jo masā.ib is ne jhele haiñ unheñ jhelegā kaun

khel jo himmat ke khele us ne vo khelegā kaun

zaḳhm jis ne apne siine par liyā taqsīm kā

chaak jis ne apne hāthoñ se siyā taqsīm kā

haañ usī ḳhush-vaqt ḳhāk-e-pāk ke beTe ho tum

meñ na mānūñgā ki aql-o-fahm ke heTe ho tum

maiñ na mānūñgā kudūrat fitrat-e-punjab hai

merā na.ara hai mohabbat fitrat-e-punjab hai

zinda-dil punjab ke beTo tumhein mera salam

tum parastar-e-guru-nanak fida-e-kirishn-o-ram

ye tumhaara des raja drupd ka panchaal des

han wahi ranjit-singh ke daur ka KHush-haal des

nam-lewa jin ke tum ho un ki sirat be-misal

un ki jurat be-misal un ki shujaat be-misal

is mein sher-o-shaeri hai is mein raqs-o-rang bhi

hir waris-shah ki bhi hai rabab-o-chang bhi

wir-singh aur amrita-piritam yahan mahir yahan

'arsh' 'aKHtar' 'josh' aur 'mahrum' se shair yahan

shir-e-gul ke mu-qalam se KHama-e-mani KHajil

is ki taswiron mein hai betab panjaban ka dil

lajpat-rae yahin jam-e-shahadat pi gae

jaane kitne qaum ki KHatir mare aur ji gae

sar-zamin-e-hind ka ye bazu-e-shamshir-e-zan

jis ke mardan-e-jari hain shoala-bar-o-saf-shikan

khetiyon mein jis ke barakat jis ke khaliyanon mein nur

jis ke baghon mein iram bas ke pahaDon par hai tur

jis ke mard-o-zan ka hissa-e-KHub-rui ka jalal

jin ke chehron par chhiDakti hai tawanai gulal

bhakDa-nangal ki jis ne be-badal tamir di

apne farzandon ko jis ne KHubi-e-tadbir di

jo masaib is ne jhele hain unhen jhelega kaun

khel jo himmat ke khele us ne wo khelega kaun

zaKHm jis ne apne sine par liya taqsim ka

chaak jis ne apne hathon se siya taqsim ka

han usi KHush-waqt KHak-e-pak ke beTe ho tum

mein na manunga ki aql-o-fahm ke heTe ho tum

main na manunga kudurat fitrat-e-punjab hai

mera nara hai mohabbat fitrat-e-punjab hai