parinda

parinda āsmāñ kī nīlgūñ mehrāb ke us paar jaatā hai

parinda bāl-o-par hai aañkh hai lekin

sunahrī choñch se parvāz kartā hai

saḌak par dhuup hai aur dhuup meñ sāyoñ ke nāḳhun haiñ

gharoñ meñ ḳhol haiñ aur āñganoñ meñ ḳhaar ugte haiñ

kisī kā kaun hai koī nahīñ sab ajnabī haiñ hairat-o-hasrat meñ zinda haiñ

vo aurat hai

vo ḳhvāhish ke lapakte ḳhanjaroñ se pyaar kartī hai

vo us kā ham-safar hai ḳhāk-o-ḳhūñ us kā muqaddar hai

ye mauj-e-āb hai ab phuul hai ab peḌ hai kal sirf patta hai

agar ye zindagī karne kī koshish meñ pareshāñ haiñ

ye aksar qatl karte haiñ

ye aksar qatl hote haiñ

lahū ke paar gulshan hai magar gulshan lahū meñ hai

nigāhoñ meñ ujaḌte shahar kī mānind tasvīroñ kā mela hai

hujūm-e-sañg-o-āhan meñ

koī āvāz detā hai koī āvāz suntā hai

magar āvāz se āvāz kā rishta nahīñ hotā

magar āvāz se āvāz kā har har silsila be-kār hotā hai

ye manzar tairtā hai āb-e-jū meñ haa.e lekin ajnabī kyuuñ hai

maiñ manzar huuñ tasalsul huuñ

magar maiñ ajnabī kyuuñ huuñ

ye farsh-e-āb-o-gil mere liye ik silsila kyuuñ hai

parinda āsmāñ kī nīlgūñ mehrāb ke us paar chāhtā huuñ

parinda fāsla kyuuñ hai

parinda māvarā kyuuñ hai

parinda aasman ki nilgun mehrab ke us par jata hai

parinda baal-o-par hai aankh hai lekin

sunahri chonch se parwaz karta hai

saDak par dhup hai aur dhup mein sayon ke naKHun hain

gharon mein KHol hain aur aanganon mein KHar ugte hain

kisi ka kaun hai koi nahin sab ajnabi hain hairat-o-hasrat mein zinda hain

wo aurat hai

wo KHwahish ke lapakte KHanjaron se pyar karti hai

wo us ka ham-safar hai KHak-o-KHun us ka muqaddar hai

ye mauj-e-ab hai ab phul hai ab peD hai kal sirf patta hai

agar ye zindagi karne ki koshish mein pareshan hain

ye aksar qatl karte hain

ye aksar qatl hote hain

lahu ke par gulshan hai magar gulshan lahu mein hai

nigahon mein ujaDte shahar ki manind taswiron ka mela hai

hujum-e-sang-o-ahan mein

koi aawaz deta hai koi aawaz sunta hai

magar aawaz se aawaz ka rishta nahin hota

magar aawaz se aawaz ka har har silsila be-kar hota hai

ye manzar tairta hai aab-e-ju mein hae lekin ajnabi kyun hai

main manzar hun tasalsul hun

magar main ajnabi kyun hun

ye farsh-e-ab-o-gil mere liye ek silsila kyun hai

parinda aasman ki nilgun mehrab ke us par chahta hun

parinda fasla kyun hai

parinda mawara kyun hai