chaara-gar

ik chamelī ke manDve-tale

mai-kade se zarā duur us moḌ par

do badan

pyaar kī aag meñ jal ga.e

pyaar harf-e-vafā pyaar un kā ḳhudā

pyaar un kī chitā

do badan

os meñ bhīgte chāñdnī meñ nahāte hue

jaise do tāza-rau tāza-dam phuul pichhle-pahar

ThanDī ThanDī subuk-rau chaman kī havā

sarf-e-mātam huī

kaalī kaalī laToñ se lapaT garm ruḳhsār par

ek pal ke liye ruk ga.ī

ham ne dekhā unheñ

din meñ aur raat meñ

nūr-o-zulmāt meñ

masjidoñ ke manāroñ ne dekhā unheñ

mandiroñ ke kivāḌoñ ne dekhā unheñ

mai-kadoñ kī darāḌoñ ne dekhā unheñ

az-azal tā-abad

ye batā chāra-gar

terī zambīl meñ

nusḳha-e-kīmiyā-e-mohabbat bhī hai

kuchh ilaaj o mudāvā-e-ulfat bhī hai

ik chamelī ke manDve-tale

mai-kade se zarā duur us moḌ par

do badan

ek chameli ke manDwe-tale

mai-kade se zara dur us moD par

do badan

pyar ki aag mein jal gae

pyar harf-e-wafa pyar un ka KHuda

pyar un ki chita

do badan

os mein bhigte chandni mein nahate hue

jaise do taza-rau taza-dam phul pichhle-pahar

ThanDi ThanDi subuk-rau chaman ki hawa

sarf-e-matam hui

kali kali laTon se lapaT garm ruKHsar par

ek pal ke liye ruk gai

hum ne dekha unhen

din mein aur raat mein

nur-o-zulmat mein

masjidon ke manaron ne dekha unhen

mandiron ke kiwaDon ne dekha unhen

mai-kadon ki daraDon ne dekha unhen

az-azal ta-abad

ye bata chaara-gar

teri zambil mein

nusKHa-e-kimiya-e-mohabbat bhi hai

kuchh ilaj o mudawa-e-ulfat bhi hai

ek chameli ke manDwe-tale

mai-kade se zara dur us moD par

do badan