ek suar se

vo tilismī dopahar thī

saañs lete ghaas ke maidān meñ

sabz miTTī se shuā.eñ ug rahī thiiñ

aur tum kirnoñ meñ

apne thūthne gaaḌe hue

dandanāte phir rahe the

maiñ tumhārī jaan kā dushman

anā ke hush-papī juute pahan kar

apne kiine kā nayā kampā liye

bartarī ke bench par

mahjūb sā baiThā huā

ik purāne jhuuT se

dāman chhuḌānā chāhtā thā

maiñ ne dhīre se tumheñ āvāz dii...

āvāz dī to

apnī teḌhī-meḌhī āñkhoñ se

mujhe tum ne ajab aalam meñ dekhā thā ki bas

maiñ jī paḌā thā

merī āñkheñ jagmagā uTThī thiiñ

mere andar titliyāñ uḌne lagī thiiñ

aur milan kī us ghaḌī meñ

us sunahre din ke pas-manzar meñ

tum hairāñ se

apnī dhun meñ

apnī jāvedāñ bad-sūratī meñ

ek chīte kī tarah se ḳhūb-sūrat lag rahe the

Darte Darte

hairatī reD-indian amriciyoñ kī tarah

dhartī kī dhamak sunte hue

tum paas aa.e

paas aakar be-yaqīnī se mujhe takne lage the

maiñ tumheñ taskīn denaa.....

phir... se bhalmansī kā rishta joḌ lenā chāhtā thā

aur apne sañg-basta haath se

jab tumheñ sahlā rahā thā

aur tumhāre khurdure bāloñ meñ

apnī uñgliyāñ uljhā rahā thā

ek albelī masarrat

ik na.ī lazzat milī

vo jo nafrat kī kamānī

dil kī tah meñ gaḌ ga.ī thī

TūTtī jaatī thī

mere andar kī kaleñ khulne lagī thī

maiñ pighaltā jā rahā thā

vo hamārī dostī...

vo hamārī fat.h-mandī kā janam-din...

vo tilismī dopahar...

saañs... lete ghaas ke maidān meñ

sabz miTī se shuā.eñ ug rahī thiiñ

wo tilismi dopahar thi

sans lete ghas ke maidan mein

sabz miTTi se shuaen ug rahi thin

aur tum kirnon mein

apne thuthne gaDe hue

dandanate phir rahe the

main tumhaari jaan ka dushman

ana ke hush-papi jute pahan kar

apne kine ka naya kampa liye

bartari ke bench par

mahjub sa baiTha hua

ek purane jhuT se

daman chhuDana chahta tha

main ne dhire se tumhein aawaz di

aawaz di to

apni teDhi-meDhi aankhon se

mujhe tum ne ajab aalam mein dekha tha ki bas

main ji paDa tha

meri aankhen jagmaga uTThi thin

mere andar titliyan uDne lagi thin

aur milan ki us ghaDi mein

us sunahre din ke pas-manzar mein

tum hairan se

apni dhun mein

apni jawedan bad-surati mein

ek chite ki tarah se KHub-surat lag rahe the

Darte Darte

hairati reD-indian amriciyon ki tarah

dharti ki dhamak sunte hue

tum pas aae

pas aakar be-yaqini se mujhe takne lage the

main tumhein taskin dena

phir se bhalmansi ka rishta joD lena chahta tha

aur apne sang-basta hath se

jab tumhein sahla raha tha

aur tumhaare khurdure baalon mein

apni ungliyan uljha raha tha

ek albeli masarrat

ek nai lazzat mili

wo jo nafrat ki kamani

dil ki tah mein gaD gai thi

TuTti jati thi

mere andar ki kalen khulne lagi thi

main pighalta ja raha tha

wo hamari dosti

wo hamari fath-mandi ka janam-din

wo tilismi dopahar

sans lete ghas ke maidan mein

sabz miTi se shuaen ug rahi thin