shah-e-daula chuha

maiñ thā māñda udaas

maqbare ke paas

ek sabz hajle meñ

apne jamūre kā

bechainī se intizār kar rahā thā

murjhā.ī huī dhuup

kaahī dolā shāhī

ḳhānqāh kī zar-nigāh

sīḌhiyoñ se utartī

dālān paar kartī

hujre kī sunahrī jāliyoñ se

chhan chhan guzartī

marmarīñ farsh par

TuuTe hue chitkabre paroñ kī tarah

halkān paḌī huī thī

ek kone meñ

himāliyā.ī silk route se

smugle kiye hue

bachchiyoñ laḌkiyoñ auratoñ vaale

chīnī faulādī juute

paloThī ke laḌkoñ ke intizār meñ

pighal pighal ke

chhoTī chhoTī ulTe kaToroñ jaisī

be-phande kī āhanī

turkī Topiyoñ bane baiThe the

maiñ choriyāñ kartā

siskāriyāñ bhartā

karachi se multān

multān se lahore

lahore se gujrāt pahuñchā thā

tarah tarah ke ghināone peshoñ

aur ghane andeshoñ se

laḌ bhiḌ ke

faqīrī iḳhtiyār kī thī

yahī qaumī mizāj

aur ḳhitte kā rivāj thā

magar das baras tak

bhiik maañg maañg ke

thak chukā thā

hama-vaqt muñh khulā rakhne

aur haath phailāne se

uñgliyāñ aur hatheliyāñ

dikhne lagī thiiñ

jabḌe karāhne lage the

ek dūr-andesh

parnā.e darvesh ke

bar-vaqt mashvare par

idhar kā safar iḳhtiyār kiyā thā

pāñch hazār kī poTlī

ḳhashḳhashī dāḌhī vaale

sajjāda-nashīn ke havāle kar dī thī

vo ek nārīkī sar vaale

chaudah pañdrah baras ke hañsmukh

ajūbe ke hamrāh

baġhlī tah-ḳhāne meñ

ye kah kar utar ga.e the

aayā abhī aayā

maiñ chaḌhī dopahar kā saaya thā

ab shaam tilmilā rahī thī

sarāsīma ḳhayāloñ meñ

vasvasoñ ke sañpoliye kulbulā rahe the

achānak āvāz aa.ī

sāhab devilry tayyār hai

to kyā dekhtā huuñ

bichāre mujāvar ke

shānoñ se ukhḌe hue

aur TuuTe hue haath

mazbūt rassī se

nañgī kamar par bañdhe haiñ

dīdoñ pe paTTī hai

hoñToñ pe Tāñke haiñ

gardan meñ paTTā hai

paTe meñ chamḌe kā

chauḌā sā tasma paḌā hai

razākār chūhe ne

bille ko mere havāle kiyā

aur chup-chāp aage ravāna huā

us kī jaltī huī muntaqim surḳh āñkhoñ meñ

sadiyoñ ke sog

jigar jigar jagmagā rahe the

main tha manda udas

maqbare ke pas

ek sabz hajle mein

apne jamure ka

bechaini se intizar kar raha tha

murjhai hui dhup

kahi dola shahi

KHanqah ki zar-nigah

siDhiyon se utarti

dalan par karti

hujre ki sunahri jaliyon se

chhan chhan guzarti

marmarin farsh par

TuTe hue chitkabre paron ki tarah

halkan paDi hui thi

ek kone mein

himaliyai silk route se

smugle kiye hue

bachchiyon laDkiyon auraton wale

chini fauladi jute

paloThi ke laDkon ke intizar mein

pighal pighal ke

chhoTi chhoTi ulTe kaToron jaisi

be-phande ki aahani

turki Topiyon bane baiThe the

main choriyan karta

siskariyan bharta

karachi se multan

multan se lahore

lahore se gujraat pahuncha tha

tarah tarah ke ghinaone peshon

aur ghane andeshon se

laD bhiD ke

faqiri iKHtiyar ki thi

yahi qaumi mizaj

aur KHitte ka riwaj tha

magar das baras tak

bhik mang mang ke

thak chuka tha

hama-waqt munh khula rakhne

aur hath phailane se

ungliyan aur hatheliyan

dikhne lagi thin

jabDe karahne lage the

ek dur-andesh

parnae darwesh ke

bar-waqt mashware par

idhar ka safar iKHtiyar kiya tha

panch hazar ki poTli

KHashKHashi daDhi wale

sajjada-nashin ke hawale kar di thi

wo ek nariki sar wale

chaudah pandrah baras ke hansmukh

ajube ke hamrah

baghli tah-KHane mein

ye kah kar utar gae the

aaya abhi aaya

main chaDhi dopahar ka saya tha

ab sham tilmila rahi thi

sarasima KHayalon mein

waswason ke sanpoliye kulbula rahe the

achanak aawaz aai

sahab dewilry tayyar hai

to kya dekhta hun

bichaare mujawar ke

shanon se ukhDe hue

aur TuTe hue hath

mazbut rassi se

nangi kamar par bandhe hain

didon pe paTTi hai

honTon pe Tanke hain

gardan mein paTTa hai

paTe mein chamDe ka

chauDa sa tasma paDa hai

razakar chuhe ne

bille ko mere hawale kiya

aur chup-chap aage rawana hua

us ki jalti hui muntaqim surKH aankhon mein

sadiyon ke sog

jigar jigar jagmaga rahe the