ایکتا

جو ایکتا کی لگن ہو دل میں تو بے قراری نہ پاس آئے

کسی کا جادو کسی کا ٹونا ہمارے اوپر نہیں چلے گا

اگر ہم اپنے کو خود سمجھ لیں اگر ہم اپنے کو آپ پرکھیں

نہ کوئی آفت کہیں اٹھے گی نہ دل دکھے گا نہ گھر جلے گا

ہر ایک بچہ ہے ایک بچہ نہ ہے کسی کا کبھی عدو وہ

یہ بھید بھاؤ یہ فاصلہ سب خود اپنا پیدا کیا ہوا ہے

کسی کا مذہب نہیں یہ کہتا کہ تم نہ جینے دو دوسروں کو

خدا تو سب کا ہے ایک لیکن مقام سجدہ جدا جدا ہے

سنا ہے کل تک تھے وہ پڑوسی بڑا تھا آپس میں بھائی چارہ

وہی پڑوسی تو اب بھی ہیں وہ مگر ہے آپس میں جنگ کیسی

مٹا دو گر دل سے بھید بھاؤ تو فاصلہ پھر کوئی نہ ہوگا

تمہیں یہ احساس خود ہی ہوگا کہ ہے دلوں میں ترنگ کیسی