yaad
Interesting Fact
(This Nazm is voiced by Dilraj Kaur on the music of Jagjit Singh and is present in the album "Yad-e-Mehboob".)
suhānī raat meñ dilkash nazāre yaad aate haiñ
nahīñ ho tum magar vo chāñd taare yaad aate haiñ
usī sūrat se din Dhaltā hai sūraj Duub jaatā hai
usī sūrat se shabnam meñ har ik zarra nahātā hai
taḌap jaatā huuñ maiñ jab dil zarā taskīn paatā hai
usī andāz se mujh ko sahāre yaad aate haiñ
nahīñ ho tum magar vo chāñd taare yaad aate haiñ
akele maiñ tumhārī yaad se bach kar kahāñ jā.ūñ?
lab-e-ḳhāmosh kī fariyād se bach kar kahāñ jā.ūñ?
tumhīñ kah do dil-e-nāshād se bach kar kahāñ jā.ūñ?
kināyoñ ko bhulātā huuñ ishāre yaad aate haiñ
nahīñ ho tum magar vo chāñd taare yaad aate haiñ
nigāhoñ meñ abhī tak hai usī din raat kā manzar
tumhāre saath meñ biite hue lamhāt kā manzar
machalte, muskurāte, jāgte, jazbāt kā manzar
tasavvur-āfrīñ vo shāh-pāre yaad aate haiñ
nahīñ ho tum magar vo chāñd taare yaad aate haiñ
mirī nazroñ se ojhal ab maqām-e-johd-e-hastī hai
na vo ehsās-e-ishrat hai, na vo anjum-parastī hai
akelā jaan kar mujh ko mirī tanhā.ī Dastī hai
mujhe biite hue lamhāt saare yaad aate haiñ
nahīñ ho tum magar vo chāñd taare yaad aate haiñ
tamannāoñ ke mele ab nahīñ lagte kabhī dil meñ
kashish baaqī rahī koī na rāhoñ meñ, na manzil meñ
dhuāñ sā ab nazar aatā hai mujh ko māh-e-kāmil meñ
tumhāre saath jitne din guzāre yaad aate haiñ
nahīñ ho tum magar vo chāñd taare yaad aate haiñ
gila is kā nahīñ kyuuñ tum ne mujh se apnā muñh moḌā
nahīñ qaabū thā apne dil pe paimān-e-vafā toḌā
tumhārī yaad ne lekin na kyuuñ ab tak mujhe chhoḌā
ye kyuuñ paiham mujhe paimāñ tumhāre yaad aate haiñ
nahīñ ho tum magar vo chāñd taare yaad aate haiñ
suhani raat mein dilkash nazare yaad aate hain
nahin ho tum magar wo chand tare yaad aate hain
usi surat se din Dhalta hai suraj Dub jata hai
usi surat se shabnam mein har ek zarra nahata hai
taDap jata hun main jab dil zara taskin pata hai
usi andaz se mujh ko sahaare yaad aate hain
nahin ho tum magar wo chand tare yaad aate hain
akele main tumhaari yaad se bach kar kahan jaun?
lab-e-KHamosh ki fariyaad se bach kar kahan jaun?
tumhin kah do dil-e-nashad se bach kar kahan jaun?
kinayon ko bhulata hun ishaare yaad aate hain
nahin ho tum magar wo chand tare yaad aate hain
nigahon mein abhi tak hai usi din raat ka manzar
tumhaare sath mein bite hue lamhat ka manzar
machalte, muskuraate, jagte, jazbaat ka manzar
tasawwur-afrin wo shah-pare yaad aate hain
nahin ho tum magar wo chand tare yaad aate hain
meri nazron se ojhal ab maqam-e-johd-e-hasti hai
na wo ehsas-e-ishrat hai, na wo anjum-parasti hai
akela jaan kar mujh ko meri tanhai Dasti hai
mujhe bite hue lamhat sare yaad aate hain
nahin ho tum magar wo chand tare yaad aate hain
tamannaon ke mele ab nahin lagte kabhi dil mein
kashish baqi rahi koi na rahon mein, na manzil mein
dhuan sa ab nazar aata hai mujh ko mah-e-kaamil mein
tumhaare sath jitne din guzare yaad aate hain
nahin ho tum magar wo chand tare yaad aate hain
gila is ka nahin kyun tum ne mujh se apna munh moDa
nahin qabu tha apne dil pe paiman-e-wafa toDa
tumhaari yaad ne lekin na kyun ab tak mujhe chhoDa
ye kyun paiham mujhe paiman tumhaare yaad aate hain
nahin ho tum magar wo chand tare yaad aate hain
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
