Trip

saañp kā zahr

hamāre jism meñ dāḳhil ho kar

mastī meñ na.ara lagātā hai

ḳhuun kī har buuñd meñ utarte hue

lutf-o-imbisāt se

nāchne lagtā hai

hamārā badan

is ke liye

tamām shiryānoñ ke dar khol detā hai

mudāfa.at ke liye banā.e ga.e tamām morche

munhadim ho jaate haiñ

chand ghanToñ meñ

saarā jism tārāj ho jaatā hai

thakan se chuur zahr

ek niiñd lene kā faisla kartā hai

lekin us kī niiñd jald hī TuuT jaatī hai

hamāre badan kā ta.affun us kī bardāsht se bāhar hai

jism ke añdhere meñ

saañp kā zahr

Thokareñ khātā phirtā hai

ise jism se bāhar nikalne kā rāsta nahīñ miltā

vo dauḌ dauḌ kar haañp jaatā hai

ek murda badan meñ

eḌiyāñ ragaḌ ragaḌ kar

bil-āḳhir

ḳhud bhī mar jaatā hai

sanp ka zahr

hamare jism mein daKHil ho kar

masti mein nara lagata hai

KHun ki har bund mein utarte hue

lutf-o-imbisat se

nachne lagta hai

hamara badan

is ke liye

tamam shiryanon ke dar khol deta hai

mudafat ke liye banae gae tamam morche

munhadim ho jate hain

chand ghanTon mein

sara jism taraj ho jata hai

thakan se chur zahr

ek nind lene ka faisla karta hai

lekin us ki nind jald hi TuT jati hai

hamare badan ka taffun us ki bardasht se bahar hai

jism ke andhere mein

sanp ka zahr

Thokaren khata phirta hai

ise jism se bahar nikalne ka rasta nahin milta

wo dauD dauD kar hanp jata hai

ek murda badan mein

eDiyan ragaD ragaD kar

bil-aKHir

KHud bhi mar jata hai