tufaili sayyara

vo ik lamha jis kī talāsh meñ

maiñ ne apne arz-o-samā kī

pur-asrār kashish se nikal kar

ek ḳhayāl-afroz ḳhalā meñ jast lagā dī

aur apne mehvar se bichhaḌ kar

is be chehra kāhkashāñ ke

dūsre sayyāroñ ke asar meñ

gardish karne aur bhaTakte rahne meñ

ik umr gañvā dī

vo lamha ik jugnū ban kar

jaltā bujhtā

ab bhī mirī ummīdoñ kī

ḳhush-fahm nigāhoñ kī zad par hai

raushnī kī raftār se maiñ masrūf-e-safar huuñ

phir bhī mirī raushan āñkhoñ se

is sīmāb sifat jugnū kā

fāsla ek hī had par hai

aur ab shāyad

vaqt to sākit hone kī sarhad par hai

mere vajūd pe

ik be-nām thakan taarī hai

lekin phir bhī

merā ta.āqub jaarī hai

wo ek lamha jis ki talash mein

main ne apne arz-o-sama ki

pur-asrar kashish se nikal kar

ek KHayal-afroz KHala mein jast laga di

aur apne mehwar se bichhaD kar

is be chehra kahkashan ke

dusre sayyaron ke asar mein

gardish karne aur bhaTakte rahne mein

ek umr ganwa di

wo lamha ek jugnu ban kar

jalta bujhta

ab bhi meri ummidon ki

KHush-fahm nigahon ki zad par hai

raushni ki raftar se main masruf-e-safar hun

phir bhi meri raushan aankhon se

is simab sifat jugnu ka

fasla ek hi had par hai

aur ab shayad

waqt to sakit hone ki sarhad par hai

mere wajud pe

ek be-nam thakan tari hai

lekin phir bhi

mera taaqub jari hai