tujh mein sab manzar mahfuz

nanhe-munne aañsū terī umr-e-darāz

tujh meñ saarī duniyā kā manzar mahfūz

tū saare lamhoñ kā saaz

tere andar qaus-e-quzah ke sātoñ rañgoñ ke jharne

jagmag karte sūraj chāñd

sabz samundar

dhānī mausam kī ḳhushbū

haath pasāre kaale mausam kā jaadū

aur dahakte añgāroñ ke surḳh mahl

tū bāzār, gharoñ aur chaurāhoñ kā hākim

mamtā kī raushan tasvīr

saare ḳhasta

nīm-barhana ḳhāk-ālūd ajsām kī ik raḳhshāñ tahrīr

tere aage

shāhoñ aur shahanshāhoñ ke

taaj bhī aa kar jhuk jaate haiñ

dekho to ik nanhā qatra

lekin ek baḌā tūfān

nanhe-munne aañsū

terī umr-e-darāz

nanhe-munne aansu teri umr-e-daraaz

tujh mein sari duniya ka manzar mahfuz

tu sare lamhon ka saz

tere andar qaus-e-quzah ke saton rangon ke jharne

jagmag karte suraj chand

sabz samundar

dhani mausam ki KHushbu

hath pasare kale mausam ka jadu

aur dahakte angaron ke surKH mahl

tu bazar, gharon aur chaurahon ka hakim

mamta ki raushan taswir

sare KHasta

nim-barhana KHak-alud ajsam ki ek raKHshan tahrir

tere aage

shahon aur shahanshahon ke

taj bhi aa kar jhuk jate hain

dekho to ek nanha qatra

lekin ek baDa tufan

nanhe-munne aansu

teri umr-e-daraaz