تجھ سے جب آنکھ لڑی

تجھ سے جب آنکھ لڑی گو یہ منزل تھی کڑی

میں نے اس منزل دشوار کو آساں سمجھا

خار زار رہ الفت کو گلستاں سمجھا

وادئ غم کے خم و پیچ کا احساس نہ تھا

کسی مشکل کسی الجھن کا مجھے پاس نہ تھا

تجھ سے جب آنکھ لڑی گویا منزل تھی کڑی

میں نے اس منزل دشوار کو آساں سمجھا

تھا جو تو پیش نظر رات دن شام و سحر

کس قدر تھی مرے جذبات کی دنیا رنگیں

تھا نگاہوں میں زمانے کا زمانا رنگیں

نہ غم ہجر تھا نے ماتم تنہائی تھا

حسن سادہ تھا تماشا میں تماشائی تھا

تجھ سے جب آنکھ لڑی گویا منزل تھی کڑی

میں نے اس منزل دشوار کو آساں سمجھا

وہ مرا جوش جنوں سحر تھا یا کہ فسوں

کر دیا جس نے مرے حوصلے کو اتنا بلند

چاند سورج پہ بھی ڈالنے جاتا تھا کمند

کچھ بڑی بات نہ تھی میرے لئے کوہ کنی

دشت و صحرا میں وہ بے باک مری گامزنی

تجھ سے جب آنکھ لڑی گو یہ منزل تھی کڑی

میں نے اس منزل دشوار کو آساں سمجھا

تھا مرے دل کا جہاں مست و مسرور و جواں

یاس و حسرت کسے کہتے ہیں یہ معلوم نہ تھا

میرے نزدیک الم کا کوئی مفہوم نہ تھا

جس طرح ظلمت شب جلوۂ بیدار میں گم

تلخیاں زیست کی تھیں ساغر سرشار میں گم

تجھ سے جب آنکھ لڑی گو یہ منزل تھی کڑی

میں نے اس منزل دشوار کو آساں سمجھا

حسن رنگیں نے ترے لطف شیریں نے ترے

کر دکھایا ہر اک آغاز کا انجام حسیں

دن حسیں رات حسیں صبح حسیں شام حسیں

رچ گئی تھی مری رگ رگ میں محبت تیری

ہائے کیا چیز تھی الفت تری چاہت تیری