tujhe KHud se alag kaise karun main

tujhe ḳhud se alag kaise karūñ meñ

tujhe jab khīñchtā huuñ ḳhud se bāhar

khiñchā aatā huuñ maiñ bhī saath tere

ajab sā jism merā ho gayā hai

hai jis meñ paañv mere haath tere

zabāñ apnī agar ḳhāmosh kar duuñ

tirī bāteñ ishāre bolte haiñ

jigar jaañ dil nazar jis ko bhī dekho

tirā hī naam saare bolte haiñ

huī hai jazb mujh meñ is qadar tū

maiñ huuñ aḳhbār to merī ḳhabar tū

ab apne safhoñ meñ tujh ko paḌhūñ maiñ

tujhe ḳhud se alag kaise karūñ maiñ

ragoñ meñ ab ''merī terā lahū hai

mirī sūrat bhī tujh sī hū-ba-hū hai

bahut arse se ḳhud meñ maiñ huuñ ġhā.eb

sarāpā jism meñ ab tū hī tū hai

makāñ huuñ maiñ tū bām-o-dar hai merā

tū ḳhadd-o-ḳhāl hai paikar hai merā

ye tere ishq kā har sū asar hai

jamāl-o-rañg sab behtar hai merā

vajūd aksar maiñ apnā bhūltā huuñ

bharam meñ tere ḳhud ko chūmtā huuñ

tirī vahshat meñ hī paañv sukūñ maiñ

tujhe ḳhud se alag kaise karūñ maiñ

hai merī raat meñ ab niiñd terī

ham ik duuje meñ yuuñ kho.e hue haiñ

hamāre ḳhvāb bhī ik dūsre ke

badan ko oḌh kar so.e hue haiñ

mire takiye meñ terī ḳhushbueñ haiñ

mirī chādar pe terī silvaTeñ haiñ

tū rahtī hai mire pahlū meñ har dam

mire bistar pe terī karvaTeñ haiñ

ho shāmeñ roz rāteñ yā sahar ho

koī bhī vaqt ho koī pahar ho

tasavvur meñ tire Duubā rahūñ maiñ

tujhe ḳhud se alag kaise karūñ maiñ

ye kahne ko hai merī dāstāñ par

sabhī aurāq meñ qisse haiñ tere

hai nā-mumkin inheñ gin paa.e koī

mere andar ka.ī qisse haiñ tere

badan huuñ maiñ merī añgḌā.ī hai tū

mere ehsās kī ra.anā.ī hai tū

badaulat tere duniyā dekhtā huuñ

nazar kā nuur hai bīnā.ī hai tū

munavvar ho gayā bin rañg roġhan

merā chehra tere javoñ se raushan

tirī raunaq meñ duniyā ko dikhūñ maiñ

tujhe ḳhud se alag kaise karūñ maiñ

maiñ shā.ir tū mirī rūmāniyat hai

maiñ fursat tū mirī masrūfiyat hai

merī taqrīr meñ tere qasīde

mirī tahrīr meñ terī sifat hai

merī har baat hai tārīf terī

merā har lafz terī kaifiyat hai

meñ sāmāñ huuñ to tū qīmat hai merī

maiñ rutba huuñ to merī haisiyat hai

simaTtī hai vahāñ har fikr merī

jahāñ tū bol de sab ḳhairiyat hai

duāoñ meñ tirā hī naam luuñ maiñ

tujhe ḳhud se alag kaise karūñ maiñ

kalā.ī meñ to chauḌī kā khanaknā

ġharaz meñ ā.īna to hai sañvarnā

maiñ jaise dasht meñ huuñ raah koī

to is par ik musāfir kā guzarnā

maiñ jaise taal detā saaz koī

to raqqāsa kā is lai par thiraknā

maiñ huuñ be-nūr sī ik jhiil aur tū

hai is par māh-e-kāmil kā utarnā

tū chehra ḳhūbsūrat maiñ huuñ parda

merā maqsad tujhe mahfūz rakhnā

terī zīnat kā pahre-dār huuñ maiñ

tujhe ḳhud se alag kaise karūñ maiñ

zabāñ urdu meñ tū merī nafāsat

agar maiñ lucknow tū hai nazākat

re.āyā huuñ maiñ is suube kā jis meñ

hamesha se rahī terī hukūmat

agar maiñ sar huuñ to dastār tū hai

maiñ vo shamshīr jis kī dhaar tū hai

maiñ huuñ poshāk tū hai itr merā

maiñ huuñ roza to phir iftār tū hai

mahīna maiñ agar ramzān kā to

mubārak eid kā tyauhār tū hai

nazīreñ aur kitnī terī duuñ maiñ

tujhe ḳhud se alag kaise karūñ maiñ

tujhe KHud se alag kaise karun mein

tujhe jab khinchta hun KHud se bahar

khincha aata hun main bhi sath tere

ajab sa jism mera ho gaya hai

hai jis mein panw mere hath tere

zaban apni agar KHamosh kar dun

teri baaten ishaare bolte hain

jigar jaan dil nazar jis ko bhi dekho

tera hi nam sare bolte hain

hui hai jazb mujh mein is qadar tu

main hun aKHbar to meri KHabar tu

ab apne safhon mein tujh ko paDhun main

tujhe KHud se alag kaise karun main

ragon mein ab meri tera lahu hai

meri surat bhi tujh si hu-ba-hu hai

bahut arse se KHud mein main hun ghaeb

sarapa jism mein ab tu hi tu hai

makan hun main tu baam-o-dar hai mera

tu KHadd-o-KHal hai paikar hai mera

ye tere ishq ka har su asar hai

jamal-o-rang sab behtar hai mera

wajud aksar main apna bhulta hun

bharam mein tere KHud ko chumta hun

teri wahshat mein hi panw sukun main

tujhe KHud se alag kaise karun main

hai meri raat mein ab nind teri

hum ek duje mein yun khoe hue hain

hamare KHwab bhi ek dusre ke

badan ko oDh kar soe hue hain

mere takiye mein teri KHushbuen hain

meri chadar pe teri silwaTen hain

tu rahti hai mere pahlu mein har dam

mere bistar pe teri karwaTen hain

ho shamen roz raaten ya sahar ho

koi bhi waqt ho koi pahar ho

tasawwur mein tere Duba rahun main

tujhe KHud se alag kaise karun main

ye kahne ko hai meri dastan par

sabhi auraq mein qisse hain tere

hai na-mumkin inhen gin pae koi

mere andar kai qisse hain tere

badan hun main meri angDai hai tu

mere ehsas ki ranai hai tu

badaulat tere duniya dekhta hun

nazar ka nur hai binai hai tu

munawwar ho gaya bin rang roghan

mera chehra tere jawon se raushan

teri raunaq mein duniya ko dikhun main

tujhe KHud se alag kaise karun main

main shair tu meri rumaniyat hai

main fursat tu meri masrufiyat hai

meri taqrir mein tere qaside

meri tahrir mein teri sifat hai

meri har baat hai tarif teri

mera har lafz teri kaifiyat hai

mein saman hun to tu qimat hai meri

main rutba hun to meri haisiyat hai

simaTti hai wahan har fikr meri

jahan tu bol de sab KHairiyat hai

duaon mein tera hi nam lun main

tujhe KHud se alag kaise karun main

kalai mein to chauDi ka khanakna

gharaz mein aaina to hai sanwarna

main jaise dasht mein hun rah koi

to is par ek musafir ka guzarna

main jaise tal deta saz koi

to raqqasa ka is lai par thirakna

main hun be-nur si ek jhil aur tu

hai is par mah-e-kaamil ka utarna

tu chehra KHubsurat main hun parda

mera maqsad tujhe mahfuz rakhna

teri zinat ka pahre-dar hun main

tujhe KHud se alag kaise karun main

zaban urdu mein tu meri nafasat

agar main lucknow tu hai nazakat

reaya hun main is sube ka jis mein

hamesha se rahi teri hukumat

agar main sar hun to dastar tu hai

main wo shamshir jis ki dhaar tu hai

main hun poshak tu hai itr mera

main hun roza to phir iftar tu hai

mahina main agar ramzan ka to

mubarak eid ka tyauhaar tu hai

naziren aur kitni teri dun main

tujhe KHud se alag kaise karun main