tujhe mujhse mohabbat hai

mire sāthī mire dilbar

ye maanā har ghaḌī tujh ko satātī haiñ mirī yādeñ

mujhe hī DhūñDhtī rahtī haiñ terī sharbatī āñkheñ

mujhe ehsās hai dilbar tirī chashm-e-tavajjoh kā

mirī mānūs aahaT se

tirī soī huī dhaḌkan achānak jaag uThtī hai

ye maanā sard rātoñ kā har ik lamha

mirī yādoñ meñ Dhaltā hai

charāġh-e-jism jaltā hai

ye maanā har 'ibādat meñ du'ā ko haath jab uTTheñ

gulābī hoñT tere bas mirā hī naam japte haiñ

tirī mā'sūm chāhat kā baḌā hī mo'tarif huuñ maiñ

magar dilbar mujhe lafzoñ kī hājat hai

ye dil iqrār māñge hai

purāne sard lahjoñ par na.ī jhankār māñge hai

koī harf-e-tamannā ho

kabhī to 'ahd-o-paimāñ hoñ

falak ke chāñd taare bhī hamāre rāz-dāñ Thahreñ

koī mausam to aisā ho ki lab āzād ho jaa.eñ

kuchh aise lafz hī chun de

jo ik 'ahd-e-mohabbat kī na.ī buniyād ho jaa.eñ

koī tahrīr aisī ho shanāsā in havāoñ par

ki mausam bhī gavāhī deñ

tujhe mujh se mohabbat hai

mire sāthī mire dilbar

mujhe lafzoñ kī hājat hai

tū apne lab kī laalī se samay kī lauh par likh de

tujhe mujh se mohabbat hai

mere sathi mere dilbar

ye mana har ghaDi tujh ko satati hain meri yaaden

mujhe hi DhunDhti rahti hain teri sharbati aankhen

mujhe ehsas hai dilbar teri chashm-e-tawajjoh ka

meri manus aahaT se

teri soi hui dhaDkan achanak jag uThti hai

ye mana sard raaton ka har ek lamha

meri yaadon mein Dhalta hai

charagh-e-jism jalta hai

ye mana har 'ibaadat mein du'a ko hath jab uTThen

gulabi honT tere bas mera hi nam japte hain

teri ma'sum chahat ka baDa hi mo'tarif hun main

magar dilbar mujhe lafzon ki hajat hai

ye dil iqrar mange hai

purane sard lahjon par nai jhankar mange hai

koi harf-e-tamanna ho

kabhi to 'ahd-o-paiman hon

falak ke chand tare bhi hamare raaz-dan Thahren

koi mausam to aisa ho ki lab aazad ho jaen

kuchh aise lafz hi chun de

jo ek 'ahd-e-mohabbat ki nai buniyaad ho jaen

koi tahrir aisi ho shanasa in hawaon par

ki mausam bhi gawahi den

tujhe mujh se mohabbat hai

mere sathi mere dilbar

mujhe lafzon ki hajat hai

tu apne lab ki lali se samay ki lauh par likh de

tujhe mujh se mohabbat hai