tulsidas ji

vo tulsīdās jis ne ilm kā dariyā bahāyā thā

vo tulsīdās jis ne ġhair ko apnā banāyā thā

vo tulsīdās jo duniyā meñ sūraj ban ke chhāyā thā

vo tulsīdās jo ġham-ḳhvāriyoñ meñ muskurāyā thā

ḳhulūs-e-dil se maiñ us ko aqīdat pesh kartā huuñ

mire pesh-e-nazar ab tak mizāj-e-hukmrānī hai

bahut uljhī huī us daur-e-māzī kī kahānī hai

magar tulsī kī azmat dost dushman sab ne maanī hai

vo rāmā.en kā likhnā shāhkār-e-zindagānī hai

maiñ us insān-e-kāmil ko mohabbat pesh kartā huuñ

ye jo kuchh kah rahā huuñ maiñ haqīqat hī haqīqat hai

lab-o-lahja kī shīrīnī mohabbat kī alāmat hai

vo aalim ho ki jāhil aaj har dil par hukūmat hai

nazar-andāz karnā us kī rāhoñ ko qayāmat hai

maiñ apnī bazm meñ is kī zarūrat pesh kartā huuñ

vo tulsī jis kī goyā.ī suḳhan kī sar-bulandī hai

suḳhan kī sar-bulandī fikr-o-fan kī sar-bulandī hai

gul-e-rangīñ vo hai jis se chaman kī sar-bulandī hai

usī kī sar-bulandī se vatan kī sar-bulandī hai

maiñ ehsās-e-vaqār-e-mulk-o-millat pesh kartā huuñ

vo tulsī jis kī rāmā.en kā ik ik scene gulshan hai

vo tulsī jis kā duniyā-e-adab meñ naam raushan hai

vo ik aalim hai ik sāhib-nazar hai māhir-e-fan hai

vo apne daur kā homer hai firdausī hai milTon hai

maiñ ai 'takmīl' use apnī riyāzat pesh kartā huuñ

wo tulsidas jis ne ilm ka dariya bahaya tha

wo tulsidas jis ne ghair ko apna banaya tha

wo tulsidas jo duniya mein suraj ban ke chhaya tha

wo tulsidas jo gham-KHwariyon mein muskuraya tha

KHulus-e-dil se main us ko aqidat pesh karta hun

mere pesh-e-nazar ab tak mizaj-e-hukmrani hai

bahut uljhi hui us daur-e-mazi ki kahani hai

magar tulsi ki azmat dost dushman sab ne mani hai

wo ramaen ka likhna shahkar-e-zindagani hai

main us insan-e-kaamil ko mohabbat pesh karta hun

ye jo kuchh kah raha hun main haqiqat hi haqiqat hai

lab-o-lahja ki shirini mohabbat ki alamat hai

wo aalim ho ki jahil aaj har dil par hukumat hai

nazar-andaz karna us ki rahon ko qayamat hai

main apni bazm mein is ki zarurat pesh karta hun

wo tulsi jis ki goyai suKHan ki sar-bulandi hai

suKHan ki sar-bulandi fikr-o-fan ki sar-bulandi hai

gul-e-rangin wo hai jis se chaman ki sar-bulandi hai

usi ki sar-bulandi se watan ki sar-bulandi hai

main ehsas-e-waqar-e-mulk-o-millat pesh karta hun

wo tulsi jis ki ramaen ka ek ek scene gulshan hai

wo tulsi jis ka duniya-e-adab mein nam raushan hai

wo ek aalim hai ek sahib-nazar hai mahir-e-fan hai

wo apne daur ka homer hai firdausi hai milTon hai

main ai 'takmil' use apni riyazat pesh karta hun