tulu-e-aftab

jo sub.h ne bañsarī bajā.e havā.eñ karvaT badal rahī haiñ

vasī.a dariyā kī halkī maujeñ taḌap rahī haiñ uchhal rahī haiñ

dhulā huā narm narm sabza zamīñ ke siine se uTh rahā hai

havā ke jhoñkoñ se mast ho ho ke nannhī shāḳheñ machal rahī haiñ

udhar jo dariyā haiñ gungunāte idhar parinde haiñ chahchahāte

sadā.eñ beloñ kī ghanTiyoñ kī surīle naġhmoñ meñ Dhal rahī haiñ

paḌī hai aalam meñ ek halchal chaman chaman ho rahī haiñ dhūmeñ

ufuq ke aivān-e-ātishīñ se sunahrī kirneñ nikal rahī haiñ

ye kis kī aamad kā hai ishāra ki nuur har-sū baras rahā hai

ye kis ke jalve ke dekhne ko jahān saarā taras rahā hai

2

ai mehr-e-tābāñ nikal ke bāhar udaas ġhunchoñ ko to hañsā de

zamīn bārish se hai fasurda pakaḌ ke shāna zarā hilā de

lagī hai terī hī aas sab ko amiir huuñ yā faqīr bekas

jo qasr-e-shāhī ko jagmagā de to jhopḌe ko jhalak dikhā de

chamak chamak ai nigār-e-getī ki tū hai paiġhām zindagī kā

ras apnī kirnoñ kā khīñch kar ab pilā de ik jaam zindagī kā

jo subh ne bansari bajae hawaen karwaT badal rahi hain

wasia dariya ki halki maujen taDap rahi hain uchhal rahi hain

dhula hua narm narm sabza zamin ke sine se uTh raha hai

hawa ke jhonkon se mast ho ho ke nannhi shaKHen machal rahi hain

udhar jo dariya hain gungunate idhar parinde hain chahchahate

sadaen belon ki ghanTiyon ki surile naghmon mein Dhal rahi hain

paDi hai aalam mein ek halchal chaman chaman ho rahi hain dhumen

ufuq ke aiwan-e-atishin se sunahri kirnen nikal rahi hain

ye kis ki aamad ka hai ishaara ki nur har-su baras raha hai

ye kis ke jalwe ke dekhne ko jahan sara taras raha hai

2

ai mehr-e-taban nikal ke bahar udas ghunchon ko to hansa de

zamin barish se hai fasurda pakaD ke shana zara hila de

lagi hai teri hi aas sab ko amir hun ya faqir bekas

jo qasr-e-shahi ko jagmaga de to jhopDe ko jhalak dikha de

chamak chamak ai nigar-e-geti ki tu hai paigham zindagi ka

ras apni kirnon ka khinch kar ab pila de ek jam zindagi ka