tulua se pahle

kabhī

yuuñ hī

kisī shab chāñdnī kā haath lagte hī

binā dastak ke khul jaatā hai ik kamre kā darvāza

darīchoñ se koī mad.hosh-kun ḳhushbū nikaltī hai

fazā meñ muskurātī hai

hayūle se ka.ī pardoñ pe bante haiñ bigaḌte haiñ

koī mauhūm aahaT phail jaatī hai samā.at par

kitābeñ jaag uThtī haiñ koī safhe ulaTtā hai

havā meñ sarsarāte haiñ adhūrī nazm ke TukḌe

fazā meñ tairte haiñ har taraf bhaTke hue misre

kahīñ maddham suroñ kā saaz koī chheḌ detā hai

añdhere ke samundar meñ koī bajrā sā chaltā hai

purāne giit bahte haiñ

udāsī taal detī hai

kabhī shīshoñ pe halkī nīlgūñ lahreñ machaltī haiñ

kisī āvāz kā saaya khulī khiḌkī meñ aatā hai

kiran koī zarā sā jhilmilā kar TuuT jaatī hai

samajh meñ kuchh nahīñ aatā

añdhere meñ bikhartā kyā hai kyā tartīb paatā hai

kabhi

yun hi

kisi shab chandni ka hath lagte hi

bina dastak ke khul jata hai ek kamre ka darwaza

darichon se koi madhosh-kun KHushbu nikalti hai

faza mein muskuraati hai

hayule se kai pardon pe bante hain bigaDte hain

koi mauhum aahaT phail jati hai samaat par

kitaben jag uThti hain koi safhe ulaTta hai

hawa mein sarsaraate hain adhuri nazm ke TukDe

faza mein tairte hain har taraf bhaTke hue misre

kahin maddham suron ka saz koi chheD deta hai

andhere ke samundar mein koi bajra sa chalta hai

purane git bahte hain

udasi tal deti hai

kabhi shishon pe halki nilgun lahren machalti hain

kisi aawaz ka saya khuli khiDki mein aata hai

kiran koi zara sa jhilmila kar TuT jati hai

samajh mein kuchh nahin aata

andhere mein bikharta kya hai kya tartib pata hai