tum aaoge

mere ghar kī dīvāreñ ab mujh ko chaaT rahī haiñ

saare shahr kī miTTī meñ jo merā hissa thā

vo bhī logoñ meñ taqsīm huā hai apnī us kī qabr par merī āñkheñ

uḌtī dhuul kī

ḳhushbū thāme laTak kar leT ga.ī haiñ

aise samay ab kaun aatā hai

TeḌhī tirchhī uñgliyoñ meñ saare vafā ke dhāge halke halke TuuT rahe haiñ

haDDiyoñ ke jalne kī bū bistar kī shiknoñ meñ ghulne lagī hai

darvāzoñ ko band karo yā kholo

havā meñ sho.ale maddham maddham raakh kī sūrat sote jaate haiñ

aur ham ukhḌī saañs ke vaqfe meñ lafzoñ ke ta.avīz gale meñ Daale

tasvīroñ se pūchhte haiñ tum aaoge

aaoge to apnī āvāzoñ ke saa.e bhī le jaanā

saare ḳhvāb aur parchhā.īñ tumhārī sāl-girah kā tohfa haiñ

in par na.e chamkīle varaq lagā kar

aisī hī laḌkī ko bhejvānā jis ko tum ne apnā kahā ho

vo laḌkī bhī darvāzoñ kī darvāzoñ se ab harf-e-vafā ko sunñe lagī hai

is ko tum mat tarsānā us ke paas chale jaanā

yā us ko paas bulā lenā vo aa jā.egī

laḌkī hai nā kahnā kaise Tālegī

mere ghar ki diwaren ab mujh ko chaT rahi hain

sare shahr ki miTTi mein jo mera hissa tha

wo bhi logon mein taqsim hua hai apni us ki qabr par meri aankhen

uDti dhul ki

KHushbu thame laTak kar leT gai hain

aise samay ab kaun aata hai

TeDhi tirchhi ungliyon mein sare wafa ke dhage halke halke TuT rahe hain

haDDiyon ke jalne ki bu bistar ki shiknon mein ghulne lagi hai

darwazon ko band karo ya kholo

hawa mein shoale maddham maddham rakh ki surat sote jate hain

aur hum ukhDi sans ke waqfe mein lafzon ke tawiz gale mein Dale

taswiron se puchhte hain tum aaoge

aaoge to apni aawazon ke sae bhi le jaana

sare KHwab aur parchhain tumhaari sal-girah ka tohfa hain

in par nae chamkile waraq laga kar

aisi hi laDki ko bhejwana jis ko tum ne apna kaha ho

wo laDki bhi darwazon ki darwazon se ab harf-e-wafa ko sunne lagi hai

is ko tum mat tarsana us ke pas chale jaana

ya us ko pas bula lena wo aa jaegi

laDki hai na kahna kaise Talegi