tum aasman ki taraf na dekho

tum āsmāñ kī taraf na dekho

ye chāñd ye kahkashāñ ye taare

yuuñ hī chamakte raheñge saare

yuuñ hī ziyā-bār hoñge daa.im

yahī rahegā nizām qaa.em

tum āsmāñ ko ho dekhte kyā

karo nazāra dil-e-hazīñ kā

ġham-e-mohabbat ke daaġh dekho

ye TimTimāte charāġh dekho

hai chand roza numūd un kī

nahīñ hai kuchh etibār-e-hastī

ye sham.a ḳhāmosh ho na jaa.e

ye baḳht-e-be-dār so na jaa.e

tum āsmāñ kī taraf na dekho

yuuñ hī sadā jalva-bār hogī

hazār kyā laakh baar hogī

haTā lo aañkh apnī charḳh par se

nazar milāo mirī nazar se

in āñsuoñ kī bahār dekho

ravāñ hai ābshār dekho

hai chand hī din kī ye ravānī

rahegī kab tak ye zindagānī

ye qalb ḳhuuñ ho ke bah na jaa.e

ye chashma bah bah ke rah na jaa.e

tum āsmāñ kī taraf na dekho

tum aasman ki taraf na dekho

ye chand ye kahkashan ye tare

yun hi chamakte rahenge sare

yun hi ziya-bar honge daim

yahi rahega nizam qaem

tum aasman ko ho dekhte kya

karo nazara dil-e-hazin ka

gham-e-mohabbat ke dagh dekho

ye TimTimate charagh dekho

hai chand roza numud un ki

nahin hai kuchh etibar-e-hasti

ye shama KHamosh ho na jae

ye baKHt-e-be-dar so na jae

tum aasman ki taraf na dekho

yun hi sada jalwa-bar hogi

hazar kya lakh bar hogi

haTa lo aankh apni charKH par se

nazar milao meri nazar se

in aansuon ki bahaar dekho

rawan hai aabshaar dekho

hai chand hi din ki ye rawani

rahegi kab tak ye zindagani

ye qalb KHun ho ke bah na jae

ye chashma bah bah ke rah na jae

tum aasman ki taraf na dekho