tum apne KHwab ghar par chhoD aao

tum apne ḳhvāb ghar par chhoḌ aao

nahīñ to ḳhaar ban kar ye chubheñge

tumhārī ruuh ko paiham Daseñge

mabādā ye tumhārā muñh chiḌā.eñ

tum in sab ā.inoñ ko toḌ aao

tum apnī aql-o-mantiq par ho nāzāñ

ye nāḳhun us jagah kyā kaam deñge

jahāñ dil kī girah uljhī huī ho

tumhāre haath apnī bebasī par

tumheñ har gaam par ilzām deñge

kahāñ haiñ vo kitābeñ vo sahā.ef

ki jan meñ zaḳhm apne rakh diye the

us insāñ ne jo sho.aloñ meñ jalā thā

us insāñ ne jo suulī par chaḌhā thā

us insāñ ne jo mar mar kar jiyā thā

tum apne ḳhvāb ghar par chhoḌ aao

tumhārī dhuup sāyoñ meñ Dhalegī

tumhārī raat shabnam par chalegī

zamīr-e-zahr-ālūda ke chyūñTe

na reñgeñge tumhārī be-hisī meñ

tumhārā tan tumhārā tan banegā

tumhārā dil tumhārā saath degā

tumheñ kyā chāhiye phir zindagī meñ

tum apne ḳhvāb ghar par chhoḌ aao

tum apne KHwab ghar par chhoD aao

nahin to KHar ban kar ye chubhenge

tumhaari ruh ko paiham Dasenge

mabaada ye tumhaara munh chiDaen

tum in sab aainon ko toD aao

tum apni aql-o-mantiq par ho nazan

ye naKHun us jagah kya kaam denge

jahan dil ki girah uljhi hui ho

tumhaare hath apni bebasi par

tumhein har gam par ilzam denge

kahan hain wo kitaben wo sahaef

ki jan mein zaKHm apne rakh diye the

us insan ne jo shoalon mein jala tha

us insan ne jo suli par chaDha tha

us insan ne jo mar mar kar jiya tha

tum apne KHwab ghar par chhoD aao

tumhaari dhup sayon mein Dhalegi

tumhaari raat shabnam par chalegi

zamir-e-zahr-aluda ke chyunTe

na rengenge tumhaari be-hisi mein

tumhaara tan tumhaara tan banega

tumhaara dil tumhaara sath dega

tumhein kya chahiye phir zindagi mein

tum apne KHwab ghar par chhoD aao