tum aur main

jo farq hai mujh meñ aur tum meñ us farq ko kyā batlā.ūñ maiñ

manzil hai tumhārī mujh se alag phir kaise tumheñ apnā.ūñ maiñ

gul-gasht-e-chaman ke tum ḳhūgar aur dasht-navardī kaam mirā

tum zauq-e-talab se begāna aur azm-o-amal paiġhām mirā

joyā-e-lab-e-sāhil ho tum mañjdhār meñ rahnā ḳhū hai mirī

maujoñ ke thapeḌe khā khā kar sailāb meñ bahnā ḳhū hai mirī

tum āb-e-baqā ke shaidā.ī maiñ zahr-e-halāhil kā joyā

maiñ ranj-o-sa.ūbat kā aadī tum aish-o-tarab ke dil-dāda

kohsār kī saḳhtī mujh meñ hai shīshe kī nazākat tum meñ hai

sūraj kī tamāzat mujh meñ hai shabnam kī latāfat tum meñ hai

maiñ loTtā huuñ angāroñ par tum jhuul rahe ho jhūloñ meñ

chaltā huuñ yahāñ maiñ kāñToñ par tulte ho vahāñ tum phūloñ meñ

tum sub.h-e-bahārāñ ke āshiq maiñ shām-e-ġharībāñ kā shaidā

tum chāñdnī rātoñ par maftūñ maiñ sho.ala-e-sozāñ kā shaidā

kaliyāñ jo chaTakne lagtī haiñ hotī hai tumhāre sar meñ dhamak

marġhūb tabī.at ko hai mirī bādal kī kaḌak bijlī kī chamak

bas husn kā sheva aur hai kyā gul-gashtī yā gul-pairahanī

aur ishq kā maqsad jāñ-bāzī yā koh-kanī yā tesha-zanī

jo farq hai mujh mein aur tum mein us farq ko kya batlaun main

manzil hai tumhaari mujh se alag phir kaise tumhein apnaun main

gul-gasht-e-chaman ke tum KHugar aur dasht-nawardi kaam mera

tum zauq-e-talab se begana aur azm-o-amal paigham mera

joya-e-lab-e-sahil ho tum manjdhaar mein rahna KHu hai meri

maujon ke thapeDe kha kha kar sailab mein bahna KHu hai meri

tum aab-e-baqa ke shaidai main zahr-e-halahil ka joya

main ranj-o-saubat ka aadi tum aish-o-tarab ke dil-dada

kohsar ki saKHti mujh mein hai shishe ki nazakat tum mein hai

suraj ki tamazat mujh mein hai shabnam ki latafat tum mein hai

main loTta hun angaron par tum jhul rahe ho jhulon mein

chalta hun yahan main kanTon par tulte ho wahan tum phulon mein

tum subh-e-bahaaran ke aashiq main sham-e-ghariban ka shaida

tum chandni raaton par maftun main shoala-e-sozan ka shaida

kaliyan jo chaTakne lagti hain hoti hai tumhaare sar mein dhamak

marghub tabiat ko hai meri baadal ki kaDak bijli ki chamak

bas husn ka shewa aur hai kya gul-gashti ya gul-pairahani

aur ishq ka maqsad jaan-bazi ya koh-kani ya tesha-zani