tum jo aate ho

tum jo aate ho

to kuchh bhī nahīñ rahtā maujūd

tum chale jaate ho

aur bolne lagte haiñ tamām

adh-khile phuul

samā.at pe jamī chaap havā band makān

guftugū karne ke aasan meñ ruke sab ajsām

murda lamhāt kā ik Dher pahāḌ

abr kī qaash uThī mauj kā sākit andām

barf lab palkoñ pe Tāñke hue motī aañsū

aur sile kānoñ meñ āvāz kī sūiyāñ be-jān

yak-ba-yak bolne lagte haiñ tamām

zindagī bunñe meñ ho jaatī hai phir se masrūf

vaqt ho jaatā hai phir ḳhāk-ba-sar be-ārām

ek panchhī jise uḌte chale jaanā hai ḳhudā jaane kahāñ

aur maiñ tinkoñ ke bikhre hue bistar kī tarah

muntazir lauT ke tum aao kisī roz yahāñ

phir hoñ ik baar muattal

ye zamīñ aur zamāñ

tum jo aate ho

to kuchh bhi nahin rahta maujud

tum chale jate ho

aur bolne lagte hain tamam

adh-khile phul

samaat pe jami chap hawa band makan

guftugu karne ke aasan mein ruke sab ajsam

murda lamhat ka ek Dher pahaD

abr ki qash uThi mauj ka sakit andam

barf lab palkon pe Tanke hue moti aansu

aur sile kanon mein aawaz ki suiyan be-jaan

yak-ba-yak bolne lagte hain tamam

zindagi bunne mein ho jati hai phir se masruf

waqt ho jata hai phir KHak-ba-sar be-aram

ek panchhi jise uDte chale jaana hai KHuda jaane kahan

aur main tinkon ke bikhre hue bistar ki tarah

muntazir lauT ke tum aao kisi roz yahan

phir hon ek bar muattal

ye zamin aur zaman