tum kahte ho kawita likh do

tum kahte ho kavitā likh do

mujhe ḳhuun bahāna paḌtā hai

shabdoñ kī khīñchā-tānī meñ

nabzoñ kā dhāga kaTtā hai

ġham ke nokīle nashtar se

dil par gudvānā paḌtā hai

banjar kāġhaz ke siine meñ

ḳhanjar ban jaanā paḌtā hai

nazmoñ ġhazloñ ke jhagḌe se

zaḳhmoñ ko chhuḌānā paḌtā hai

vo galī jahāñ vo rahtā thā

us galī meñ jaanā paḌtā hai

us kī har baat bayāñ karke

phir naam miTānā paḌtā hai

vo aks jise maiñ yaad nahīñ

use raqs dikhānā paḌtā hai

saare tevar girvī rakh kar

us ko chhuḌvānā paḌtā hai

vaah vaah ke mai-ḳhānoñ meñ dhut

ghar le kar aanā paḌtā hai

pāgal-pan kī had tak jā ke

phir vāpas aanā paḌtā hai

sab chaturā.ī bik jaatī hai

jab shunya kamānā paḌtā hai

ātish-bāzī ātish-bāzī

ḳhud ko hī jalānā paḌtā hai

zevar nahīñ ta.avīz hai ye

partoñ meñ chhupānā paḌtā hai

kahte ho ek kavitā likh do

tum kahte ho kawita likh do

mujhe KHun bahana paDta hai

shabdon ki khincha-tani mein

nabzon ka dhaga kaTta hai

gham ke nokile nashtar se

dil par gudwana paDta hai

banjar kaghaz ke sine mein

KHanjar ban jaana paDta hai

nazmon ghazlon ke jhagDe se

zaKHmon ko chhuDana paDta hai

wo gali jahan wo rahta tha

us gali mein jaana paDta hai

us ki har baat bayan karke

phir nam miTana paDta hai

wo aks jise main yaad nahin

use raqs dikhana paDta hai

sare tewar girwi rakh kar

us ko chhuDwana paDta hai

wah wah ke mai-KHanon mein dhut

ghar le kar aana paDta hai

pagal-pan ki had tak ja ke

phir wapas aana paDta hai

sab chaturai bik jati hai

jab shunya kamana paDta hai

aatish-bazi aatish-bazi

KHud ko hi jalana paDta hai

zewar nahin tawiz hai ye

parton mein chhupana paDta hai

kahte ho ek kawita likh do