tum kis se milne aae ho

tum kis se milne aa.e ho

kis chehre se kaam hai tum ko

kin āñkhoñ se baat karoge

tum jo chehra dekh rahe ho

us meñ haiñ kitne hī chehre

jin ko lagā.e maiñ phirtā huuñ

tum kis se milnā chāhoge

us shā.ir se jis ko tum ne

dekhā hai stage pe aksar

sab ko bhūle ḳhud ko bhulā.e

badmastoñ kā bhes banā.e

jis ne falak par hukm chalā.e

sañg-e-malāmat jis par aa.e

mahfil kī mahfil jhuum uTThī

jis ne aise sher sunā.e

tum kis se milne aa.e ho

us lambe gore chehre se

jis par aag ke phuul khile haiñ

jo ik sīdhe qadam ko sambhāle

dil meñ saikḌoñ zaḳhm chhupā.e

apnī anā kī laash uThā.e

kam-zarfoñ kī is duniyā meñ

kitne yugoñ se sargardāñ hai

tum kis se milne aa.e ho

us insāñ se jis ke andar

ek qātil zaanī sāriq ke

tīnoñ chehre ek hue haiñ

lekin us ke haath bañdhe haiñ

pairoñ meñ zanjīreñ paḌī haiñ

aur vo qātil ab buzdil hai

aur vo zaanī ab shauhar hai

aur vo sāriq ab munsif hai

tum kis se milne aa.e ho

maiñ ḳhud apne aap se mil kar

pahroñ soch meñ paḌ jaatā huuñ

kis chehre se baat karūñ

tum kis se milne aae ho

kis chehre se kaam hai tum ko

kin aankhon se baat karoge

tum jo chehra dekh rahe ho

us mein hain kitne hi chehre

jin ko lagae main phirta hun

tum kis se milna chahoge

us shair se jis ko tum ne

dekha hai stage pe aksar

sab ko bhule KHud ko bhulae

badmaston ka bhes banae

jis ne falak par hukm chalae

sang-e-malamat jis par aae

mahfil ki mahfil jhum uTThi

jis ne aise sher sunae

tum kis se milne aae ho

us lambe gore chehre se

jis par aag ke phul khile hain

jo ek sidhe qadam ko sambhaale

dil mein saikDon zaKHm chhupae

apni ana ki lash uThae

kam-zarfon ki is duniya mein

kitne yugon se sargardan hai

tum kis se milne aae ho

us insan se jis ke andar

ek qatil zani sariq ke

tinon chehre ek hue hain

lekin us ke hath bandhe hain

pairon mein zanjiren paDi hain

aur wo qatil ab buzdil hai

aur wo zani ab shauhar hai

aur wo sariq ab munsif hai

tum kis se milne aae ho

main KHud apne aap se mil kar

pahron soch mein paD jata hun

kis chehre se baat karun