tum mujhe yaad aaogi

bichhaḌte vaqt

us ne kahā thā

suno tum mujhe yaad aaogī

jab kabhī

sāhil samundar par

nañge paañv chalte hue

samundar kī āġhosh meñ

Dūbte sūraj ke manzar kā pīlā-pan

āñkhoñ meñ utregā

tum mujhe yaad aaogī

jab kabhī

barsātoñ kī añdherī rātoñ meñ

dil ke kisī goshe meñ

ik halkī sī aahaT pā kar

yādeñ gahrī niiñd se jāgeñgī

tum mujhe yaad aaogī

jab kabhī ziist ke kisī moḌ par

kisī ġham-gusār kisī jāñ-nisār se

kuchh kahne sunñe kā man chāhegā

jab kabhī

dil ye chāhegā ki

kisī hamdam kisī mahbūb kī chāhat meñ is duniyā ko chhoḌ de

tum mujhe yaad aaogī

jab kabhī sardiyoñ kī shāmoñ meñ

ye ḳhvāhish dar-dil pe dastak degī ki

saath ik sāthī ho

jis kī bātoñ meñ jis kī sāñsoñ meñ

ik anokhī garmī ho

chāhatoñ kī hiddat ho

tum mujhe yaad aaogī

is se maiñ us se kyā kahtī

mā-sivā.e is ke ki

tumheñ yaad aane ke liye

kisī havāle kisī mausam kisī manzar kī hājat kī

kisī bhī vāste kī zarūrat nahīñ

dil kī dhaḌkan har ghaḌī har pal

saath chaltī hai

saath rahtī hai

aur tum mere dil kī dhaḌkan ho

jo chaah kar bhī ruk nahīñ saktī

maiñ tum ko bhuul nahīñ saktī

bichhaDte waqt

us ne kaha tha

suno tum mujhe yaad aaogi

jab kabhi

sahil samundar par

nange panw chalte hue

samundar ki aaghosh mein

Dubte suraj ke manzar ka pila-pan

aankhon mein utrega

tum mujhe yaad aaogi

jab kabhi

barsaton ki andheri raaton mein

dil ke kisi goshe mein

ek halki si aahaT pa kar

yaaden gahri nind se jagengi

tum mujhe yaad aaogi

jab kabhi zist ke kisi moD par

kisi gham-gusar kisi jaan-nisar se

kuchh kahne sunne ka man chahega

jab kabhi

dil ye chahega ki

kisi hamdam kisi mahbub ki chahat mein is duniya ko chhoD de

tum mujhe yaad aaogi

jab kabhi sardiyon ki shamon mein

ye KHwahish dar-dil pe dastak degi ki

sath ek sathi ho

jis ki baaton mein jis ki sanson mein

ek anokhi garmi ho

chahaton ki hiddat ho

tum mujhe yaad aaogi

is se main us se kya kahti

ma-siwae is ke ki

tumhein yaad aane ke liye

kisi hawale kisi mausam kisi manzar ki hajat ki

kisi bhi waste ki zarurat nahin

dil ki dhaDkan har ghaDi har pal

sath chalti hai

sath rahti hai

aur tum mere dil ki dhaDkan ho

jo chah kar bhi ruk nahin sakti

main tum ko bhul nahin sakti