tumne use kahan dekha hai

kabhī tum ne dekhā hai

ḳhvāboñ se aage kā manzar

jahāñ chāñd tāroñ se rūThī huī

raat apne barahna badan par

siyah raakh mal kar

alaav ke chāroñ taraf nāchtī hai!

kabhī tum ne jhāñkā hai

palkoñ ke pīchhe

thakī niilī āñkhoñ ke andar

jahāñ āsmānoñ kī saarī udāsī

ḳhalā-dar-ḳhalā tairtī hai

kabhī tum ne ik din guzārā hai

rastoñ ke donoñ taraf īstāda

ghane sabz peḌoñ ke nīche

jahāñ dhuup apne liye

rāsta DhūñDhtī hai!

kabhī tum ne pūchhā hai

chalte hue rāste meñ

kisī ajnabī se

patā us ke ghar kā

havā jis ke qadmoñ ke miTte nishāñ chūmtī hai

nagar-dar-nagar ghūmtī hai!!

kabhi tum ne dekha hai

KHwabon se aage ka manzar

jahan chand taron se ruThi hui

raat apne barahna badan par

siyah rakh mal kar

alaw ke chaaron taraf nachti hai!

kabhi tum ne jhanka hai

palkon ke pichhe

thaki nili aankhon ke andar

jahan aasmanon ki sari udasi

KHala-dar-KHala tairti hai

kabhi tum ne ek din guzara hai

raston ke donon taraf istada

ghane sabz peDon ke niche

jahan dhup apne liye

rasta DhunDhti hai!

kabhi tum ne puchha hai

chalte hue raste mein

kisi ajnabi se

pata us ke ghar ka

hawa jis ke qadmon ke miTte nishan chumti hai

nagar-dar-nagar ghumti hai!!