tum sach mein bahut achchhi ho

tumhārā ye pyaar bharā jumla

mujhe zindagī jiinā āsān banātā hai

merī kum.hlā.ī huī zindagī ko

tar-o-tāzgī sī baḳhshtā hai

tumhāre pyaar bhare alfāz

kānoñ meñ ras gholne lagte haiñ

āñkhoñ meñ ik chamak sī aa jaatī hai

hoñToñ pe muskān chhā jaatī hai

tum jab bhī mujh se ye kahte ho ki

tum sach meñ bahut achchhī ho

merī be-jān sī ruuh meñ jaan aa jaatī hai

maiñ apnā dukh-dard bhuul jaatī huuñ

apnī hī zaat ke gumbad meñ qaid

chahakne lagtī huuñ mahakne lagtī huuñ

tum jab bhī mujh se ye kahte ho ki

tum sach meñ bahut achchhī ho

tumhārī yaad meñ khoī khoī sī

tumhāre pyaar kī ḳhushbū se mo.attar

maiñ lamhoñ meñ sadiyāñ jī letī huuñ

haañ lamhoñ meñ sadiyāñ jī letī huuñ

aur phir maiñ sochne lagtī huuñ

mujhe aisā lagtā hai ki

gar maiñ bahut achchhī huuñ to

mujhe dekhne vaalī vo āñkheñ

dar-asl behad dilkash haiñ

vo dil jis meñ maiñ bastī huuñ

be-intihā ḳhūbsūrat hai

mujhe jiine kā hausla dene vaalī

tumhārī pyaar bharī soch

sach meñ bahut achchhī hai

sach to ye hai ki

maiñ nahīñ tum bahut achchhe ho

tum sach meñ bahut achchhe ho

haañ tum bahut hī achchhe ho

tumhaara ye pyar bhara jumla

mujhe zindagi jina aasan banata hai

meri kumhlai hui zindagi ko

tar-o-tazgi si baKHshta hai

tumhaare pyar bhare alfaz

kanon mein ras gholne lagte hain

aankhon mein ek chamak si aa jati hai

honTon pe muskan chha jati hai

tum jab bhi mujh se ye kahte ho ki

tum sach mein bahut achchhi ho

meri be-jaan si ruh mein jaan aa jati hai

main apna dukh-dard bhul jati hun

apni hi zat ke gumbad mein qaid

chahakne lagti hun mahakne lagti hun

tum jab bhi mujh se ye kahte ho ki

tum sach mein bahut achchhi ho

tumhaari yaad mein khoi khoi si

tumhaare pyar ki KHushbu se moattar

main lamhon mein sadiyan ji leti hun

han lamhon mein sadiyan ji leti hun

aur phir main sochne lagti hun

mujhe aisa lagta hai ki

gar main bahut achchhi hun to

mujhe dekhne wali wo aankhen

dar-asl behad dilkash hain

wo dil jis mein main basti hun

be-intiha KHubsurat hai

mujhe jine ka hausla dene wali

tumhaari pyar bhari soch

sach mein bahut achchhi hai

sach to ye hai ki

main nahin tum bahut achchhe ho

tum sach mein bahut achchhe ho

han tum bahut hi achchhe ho